Ride Bohol Cycling Race
CEBU, Philippines - Amerikano ug Sugbuanong seklista maoy nanghawod sa Stage 3 sa Ride Bohol Cycling Race nga usa ka 40 ka kilometro nga criterium race didto sa isla sa Panglao sa Bohol.
Si Keith DeFiebre, lumad gikan sa Monterrey, California, maoy labing masidlakon sa Men Golden category. Iyang gitapos ang makutas nga lumba sud sa usa ka oras, 32 minutos ug 48 segundos.
Kulbahinam kaayo ang kadaugan ni DeFiebre gumikan kay labaw lamang siya og usa ka gutlo ni Boy Tiples sa Manila, nga maoy nalandig sa ikaduhang dapit sa oras nga 1:32:49.
Sikit sab kaayong mipahiluna sa ikatulo ug ikaupat nga puwesto ang Sugbuanong si Dr. Jonathan Simbajon (1:32:50) ug ang garbo sa mga Bol-anon nga si Frank Labra (1:32:51).
Lain pang Sugbuanon nga si Dr. John Gayatin ang mikapyot sa ikalimang dapit sa oras nga 1:35:03.
Sa Men B/C category, si Jonel Carcueva sa Sugbo miratsada dayon pagsugod sa karera ug wala na molingi pa dayon na ngadto sa paglangkat sa titulo sud sa oras nga 50 minutos ug walo ka segundos.
Mipahiluna sa ikaduha hangtud sa ikalimang puwesto mao sila si Adelino Buligan sa Bohol (59:44.43), Amon Espinosa sa Cebu (59:44.83), Roger Torreon sa Bohol (59:45.54), ug Harry Jumamoy (59:45.94).
Sa laing bahin, ang 16-anyos nga si Ana Patricia Maximo sa YKKBikes.com gihatagan og 'Special Award' sa mga organizers gumikan sa iyang kaisog ug determinasyon pag-apil sa maong karera diin iyang gikaatbang ang lig-on nga mga lalaking seklista. (BANAT PALARO)
- Latest
