Bonifacio nanghawod sa Osmeña Peak trail run

CEBU, Philippines - Adlaw gyud ni Bonifacio kagahapong  adlawa gumikan kay si Bonifacio Monjas maoy nanghawod sa labing unang Osmeña Peak Challenge didto sa lungsod sa Dalaguete.

Si Monjas, nga gipangan gikan sa usa sa mga nasudnon natong mga bayani, nagmaya sab atol sa usa sa mga mahinungdanong adlaw sa nasud human iyang gidominar ang 37 ka kilometro nga lumba sa dagan sud sa tulo ka oras ug 57 segundos.

Iyang gibiyaan og tagaliog si Desederio Engbino nga mitapos sa ikaduhang dapit sa oras nga 3:09:19.

 Si  Ramil Fajardo maoy nalandig sa ikatulong puwesto sa oras nga 3:33:59, gisundan  kini nilang Alster Arellano (4:06:33) ug Laurence Furo ug Jay Yosores nga parehong mioras og 4:07:46.

Mipahiluna gikan sa ikapito hangtod sa ika-10 nga dapit sa men’s open division mao sila si Merson Gasang (4:09:57), Ruberto Besties (4:14:30), Christopher Dignos (4:21:04) ug Eljun Flores (4:35:14).

Sa women’s category, si Mereeis Ramirez ang mikulit sa labing paspas nga oras nga  4:11:51. Gisundan  ni Daisy Batac sa oras nga 4:43:07, samtang si Evangeline Balazuela maoy ikatulo sa oras nga 5:00:27.

Naglangkob sa top 10 mao sila si Hannah Huana (5:01:42), Sharon Torres (5:12:49), Helen Dionson (5:14:33), Gigi Matutinao (5:26:17), Edna Gerali (5:28:42), Malu Busa (5:31:54) ug Becca Pankhurst (5:34:03). (BANAT PALARO)