Team Capt. Gacasan, Blue Coast Laundry Abante sa semifinals

CEBU, Philippines - Gipangpilde sa Team Capt. Gacasan ug Blue Coast Laundry ang tagsa-tagsa nilang kaatbang aron moabante sa semifinals sa Viva Forty Christmas League 2015 basketball tournament niadtong Sabado didto sa Guadalupe Sports Complex, siyudad sa Sugbo.

Ang Team Capt. Gacasan mipukan sa Aulga Hardware sa iskor nga  67-65, samtang ang Blue Coast Laundry mikuso-kuso sa Gallardo/Navaja, 48-40.

Sila si Dante Antonio ug Jonel Dañoso parehong mikadlit og 13 puntos aron mangulo sa kadaugan.  Si Lemuel Gabunada mitikdol og 10 puntos alang sa Team Capt. Gacasan nga miagi pa og hagip-ot nga dalan una makalabang sa kutas nga kadaugan.

Si Gaga Cabanilla mao lang ang nakaiskor og double figures alang sa Aulga Hardware pinaagi sa iyang 17 puntos.

Apan bisan pa sa ilang kapildihan, ang  Aulga Hardware miabante lang gihapon sa semifinal round.

Sa laing bahin, wala’y bisan usa ka player ang miiskor og double digits sa Blue Coast Laundry, apan  maayo kaayo ang pagkabahin-bahin sa ilang  mga puntos aron moladlad og daog.

Ang Gallardo/Navaja gipangulohan ni Escuyos, kinsa mikamada’g 14 puntos.

Sa laing aksiyon, ang Dayon Enterprises & Printing Press  milubong sa Team Gayoso, 78-55 aron pagseguro nga mahimong topseed pagtapos sa elimination round.

Si ‘El Presidente’ Allan Abella maoy topscorer sa Dayon Enterprises nga mipabuhagay og 21 puntos, gisundan ni Mike Granada nga mihirit og 12 puntos.

Sila si Velmonte ug Bernard Jacaban nagkumboya’g 24 puntos  alang sa natagak nga Team Gayoso.

Ang Dayon mitapos sa eliminasyon bitbit ang 4-1 nga baraha, samtang ang  Aulga Hardware, Blue Coast Laundry ug Capt. Gacasan parehong nagtangag og 3-2 win-loss records.

Ang semifinals duwaon karong Sabado diin ang No. 1 Dayon Enterprises makigsangka batok sa No. 4  Team Capt. Gacasan ug ang No. 2 Aulga Hardware makigbatok sa No. 3 Blue Coast Laundry diin ang modaog maoy mag-abot sa kampiyonato.

Ang torneyo gipadagan ni ‘El Presidente’ Allan Abella inabagan sa tanang mga miyembro sa Viva Forty ballclub.

Puntos matag usa

Unang duwa:

Team Capt. Gacasan (67) – Antonio 13, Dañoso 13, Gabunada 10, Postrero 8, Cortez 7, Mante 7, Rivera 6, Tejam 3.

Aulga Hardware (65) – Cabanilla 17, Ventic 9, Reunido 7, Esgana 4, Navaja 4, Veloso 4, Fernando 5, Navaja 3, Miego 3, Bacatan 2, Adolfo 2, Villarba 2, Aulga 1.

Ikaduhang duwa:

Blue Coast Laundry (48) – Iligan 8, Racho 7, Sasing 7, Ibo 6, Cabusas 6, Mabatid 4, Lopez 4, Cabañero 4, Delda 2.

Gallardo/Navaja (40) – Escuyos 14, Monero 4, Hinagay 4, Paez 2, Labra 2, Billota 2, Cabarrubias 2.

Ikatulong duwa:

Dayon Ent. & Printing Press (78) – Abella 21, Granada 12, Verano 10, Ybarita 9, Bihag 8, Elizalde 6, Tinapay 6, Verano 4, Calonia 2.

Team Gayoso (55) – Velmonte 13, Jacaban 11, Gayoso 6, Delda 6, Rivera 6, Rama 5, Navaja 4, Alcantara 2.  (BANAT NEWS)