CARLSBERG, Manila beer sa GBC Randy cup finals

CEBU, Philippines - Ang Carlsberg Beer ug ang Manila Beer milampos sa ilang tagsa-tagsa ka misyon sa semifinals aron maoy mag-abot sa kampiyonato sa GBC Randy Gavas Cup 2015 basketball tournament niadtong Domingo didto sa Pob. Talisay Sports Complex, dakbayan sa Talisay.

Ang  no. 1 ug wa’y pildeng Carlsberg Beer miangkon sa unang luna sa finals human gibihag ang no. 4  Gold Eagle Beer, 113-98, samtang ang no. 2 Manila Beer mibira sa ikaduhang lingkoranan sa finals pinaagi sa pagpilde sa no. 3 Beer Hausen, 100-90.

Ang knockout finals gikatakda karong Domingo human sa duwa tali sa Gold Eagle Beer ug Beer Hausen nga mag-ilog sa ikatulong puwesto.

Si councilor Danny Caballero maoy mihaling  sa nagdilaab nga opensa sa Carlsberg sa unang kuwarter aron moposte’g 21 puntos nga bentaha sa second period.

Bisan pa sa maong labaw, ang Gold Eagle Beer mikayod lang gihapon aron makan-an ang labaw ug miabante pa gani sa third period, 81-80 kortesiya ni Bobot Labuca. Hinuon, ang Carlsberg Beer dali sab kaayong nakatubag sa ilang opensa sa panagtambayayong nilang Col. Johnson Calub ug Noel Rabadon aron inaton og balik ang ilang labaw dayon na pagkulit og daog.

Si Col. Calub maoy topscorer sa Carlsberg Beer pinaagi sa iyang 26 puntos, gisundan ni  councilor Caballero sa iyang 21 puntos ug Alvin Crisologo nga adunay 14 puntos. Si Cocoy Dequit mitampo’g 12 puntos, samtang sila si Rabadono ug Gino Mabuyo adunay 11 puntos matag usa alang sa Carlsberg Beer.

Ang Gold Eagle Beer gipangulohan ni Labuco, kinsa mipatuasik og 20 puntos, sila si Mendell Amatong ug Jupol Basalo parehong mitimbre’g 18 puntos, samtang sila si Ramil Gonzaga ug Lino Valiente mitampo’g 12 puntos matag usa.

Sa laing bahin, si Junjun Capala miiskor og 20 puntos aron maoy mangu sa  Manila Beer.

Mipakita sab og maayong labok silang Romy Ruales ug Jopel Bisnar nga miamot og 16 puntos matag usa, si Ondong Angcon miabuno’g 15 puntos.

Gipangulohan sab ni Junjun Bascon ang Beer Hausen nga mikamada’g 18 puntos, gisundan nilang Val Daan ug Allan Gonzaga nga mihirit og 14 puntos matag usa, samtang sila si Rameses Capala, Lito Piloto ug Dennis Llanda parehong miantog og 10 puntos.

Ang liga nga gipadagan sa  Genuine Basketball Club ubos sa ilang presidente ug  commissioner nga si Randy Gavas gipaluyohan  ni Talisay City Vice Mayor Atty. Romeo Villarante ug sa CCR Cars nga gipanag-iya ni Ephoy Caballero.

Laing mga opisyal sa GBC naglakip nilang Capt. Tito Caballero (vice president), Boboy Bisnar (treasurer) ug Popoy Quiñonez (adviser).

Puntos matag usa

Unang duwa:

CARLSBERG BEER (113) – Calub 26, Caballero 21, Crisologo 14, Dequit 12, Mabuyo 11, Rabadon 11, Briones 7, Utos 7, Quiñonez 5.

GOLD EAGLE (98) – Labuca 20, Amatong 18, Basalo 18, Gonzaga 12, Valiente 12, Cabasa 8, Kwan 6, Cañizares 4.

Ikaduhang duwa:

MANILA BEER (100) – Capala 20, Ruales 16, Bisnar 16, Angcon 15, Abarquez 8, Patiluna 8, Malaga 7, Neñel 6, Belamide 4.

BEER HAUSEN (90) – Bascon 18, Daan 14, Gonzaga 14, Capala 10,  Piloto 10, Llanda 10, Cataytay 6, Alicaway 4, Esmero 2, Bacho 2. (BANAT PALARO)