2GO/Beryong nakaipsot sa JRS/lamay sa Vendredi Caging
CEBU, Philippines - Mieskala na sab ang 2GO/Beryong aron moariya og laing daog, ning higayona batok sa JRS/Lamay, 69-67 sa nagkainit nga aksiyon sa second season Vendredi Ballclub basketball tournament niadtong Martes sa gabii didto sa Garden Bloom Village open court sa Pitogo, Consolacion.
Upat ka magduduwa sa 2GO/Beryong ang miiskor og double digits sa pagpangulo ni Allan Abrasado, kinsa mihakot og 20 puntos.
Si Gary Rojas mitimbre’g 15 puntos, si Beryong P. ug Tamtam Sanchez miabuno’g 13 ug 10 puntos matag usa alang sa 2GO/Beryong nga milabaw og otso puntos paghuman sa unang 10 minutos sa duwa, 21-13.
Misikit unta ang JRS/Lamay sa hinapos nga bahin sa fourth quarter, apan ulahi na ang tanan nilang paningkamot kay nahutdan sila og oras.
Sa gilauman, ang reigning MVP nga si Marchin Rojas maoy topscorer sa pilderong JRS/Lamay nga mikabya’g 19 puntos, samtang laing duha niya ka teammates ang mikamada’g double figures.
Ang 2GO/Beryong mikahig na karon og 2-1 nga baraha, samtang ang JRS/Lamay adunay 1-3 win-loss record ning maong torneyo nga gipaluyohan sa Geobert Merchandise ni Onesimo Sajot.
Sa lain bahin, ang DHL/Nonoy midaog nga wala patuloi’g singot dihang na-forfeit ang LBC/Daru.
PUNTOS MATAG USA
2GO/BERYONG (69) – Allan 20, Gary 15, Beryong 13, Tamtam 10, Dave 7, Barry 4.
JRS/LAMAY (67) – Marchin 19, Johnrex 18, Adonis 12, Aton 7, Lamay 6, Tamak 3, Badok 2.
- Latest
