MP Brokers kampeyon sa 3rd BOC-CIPU

CEBU, Philippines – Nakatilaw na gyud sa katam-is sa pamati isip usa ka champion team ang MP Brokers ni team owner Marty Pimentel human sila makaipsot batok sa Rollway-Petracorta Brokers sa iskor, 89-85 atol sa usa ka kulba-hinam kaayong knockout finals sa 3rd season sa BOC-CIPU Friendship Cup kaniadtong Huwebes, Disyembre 11 didto sa barangay Tinago gym, ning dakbayan.

Bisan og naglabaw sila'g 20 puntos sa uwahing bahin sa second quarter, 49-29 human sa basket ni Michael Amistoso apan ang iyang three-pointer ug split charities maoy naghatag sa MP Brokers  og 21 puntos nga labaw, 54-33 may 2:41 ang oras sa mao gihapong period.

Hinay-hinay nga naapas sa Rollway-Petracorta ang ilang biya tungod kay ilang nasulbad ang trapping defense sa MP ug naglabaw  gani sila sa kataposang 2:39 ang oras  sa fourth quarter human sa lay-up ni Billy Sagario kinsa nakailog og inbound pass, 81-79.

Natabla ni Reden Vilaronza ang iskor sa 83-all dihang nakapunit siya'g tagak gikan sa rebound sa kataposang 1:21 ang oras sa duwa apan wala madugay, nakahimo'g krusyal kaayong three-pointer si Rex Darious Bensi sa nahibiling 23 segundos nga maoy naghatag sa MP og 86-83 nga abante may 27.3 ang nahibiling oras ug ang iyang duha ka free throws ug usa ka free throw ni Beking Rollon maoy nagselyado sa ilang kadaugan.

Mao kadto'y unang titulo alang kang Pimentel sulod sa tulo niya ka tuig nga sponsor og team tungod kay wala sila moabante sa finals dihang didto pa ang torneyo sa Benedicto College gym ug sa Cogon-Ramos gym.

"Nakatilaw na gyud tawon ko og unsay bation sa champion. Una ni nakong pagka-champion busa malipayon kaayo ko. Pasalamat ko sa akong mga players nga ila ning nahimo," matud pa ni Pimentel kinsa naglaraw nga musalmot gihapon pag-usab aron depensaan ang ilang korona.

Si ex-UC Webmasters Daniel Enriquez maoy nangu sa MP sa iyang 20 puntos samtang midugang og 18 puntos si Rollon ug parehong may 11 puntos silang Bensi ug Amistoso.

Si Enriquez maong napiling MVP samtang ang kandidato pagka MVP nga si Julius Tarona maoy nangu sa Rollway-Petracorta sa iyang 32 puntos.

Sa sayo pa, maoy nakaangkon sa ikatulong pwesto ang Portmen ni Boodie Monteno human ilang gipukan ang Alin Brokers sa iskor, 97-80.

Puntos matag usa:

First Game:

Portmen (97) —  Into 18, Aninon 15, Maunes 14, Manulat 12, Monteño 7, Javellana 7, Sanguenza 7, Gabica 6, Mondin 3, Gerundio 3, yu 2, Adante 2.

Alin Brokers (80) — Cayanong 17, Alin 12, Estorgio 12, Tabaloc 12, Barral 11, Villomo 6, Lleve 4, Baltonado 2, Tradio 2.

Second Game:

MP Brokers (89) —   Enriquez 20, Rollon 18, Bensi 11, Amistoso 11, Abellana 8, Pangue 7, Elloren 6, N. Medalle 4, B. Medalle 2, Villacastin 2.

Rollway-Petracorta (85) —   Tarona 32, Palero 15, Moral 11, Berame 9, Villaronza 4, Manlosa 3, Sagario 2, Olloves 2. (GGM) (BANAT NEWS)