Hameed, Malthus Nidominar sa 3rd Phil-Asia Bodybuilding Competition

CEBU, Philippines - Nahimong overall champion sila si Syed Siddiq Hameed sa India ug Sarah Malthus sa New Zealand sa bag-o lang natapos nga 3rd Philippine-Asia 2014 International Bodybuilding  Championships diha sa Mariner’s Court Convention Center.

Si Hameed misakmit  og duha ka titulo pinaagi sa Mr. Physique (tall class) ug sa novice category, samtang si Malthus maoy milangkat  sa  Ms. Figure title.

Sama ni Hameed, si Emmanuel Galicia sa Kuwait midaog sab og duha ka titulo pinaagi sa masters ug Mr. Physique (short class).

Wala sab magpaalkanse ang mga Pinoy dihang giharos nila ni Colleen Sheen Balinas, Karen Ann Sison ug Charlene Eusebio ang  Ms. Fitness showdown.

Si Annielyn Rivas maoy nangu sa mga Pinoy nga midaog sa Ms.  Shape/Bikini nga naglakip nilang Banilas, Christin Sombilon, Eusebio ug Christie Bolongita.

Si Miguel Aro maoy top performer sa Male Fitness Model, gisundan ni Lesme Dulfo Jr., Dan Kristoffer Canedo, Rendon Labador ug Yvaes Chester Duhig. Si Reymundo Jacobo maoy napiling Mr. Athletic uban nilang Dennis Nichol Delgado, Francis Faroden, Robinson Olea ug Farley Litigio nga maoy mikompleto sa top five winners.

Si Michael Baleo  nidaog sa Mr. Physique (medium class).

Ang kompetisyon nga gipasiugdahan sa Workout Fitness Center, gipaluyohan ni Jim Pitt sa New Zealand, NABBA Asia-Pacific Secretary-General ug ingon man mga opisyales sa Unified Bodybuilding and Fitness Federation of the Philippines (UBFFP) nga  gipangulohan sa ilang presidente Engr. Juanito ‘Jun’ Tanyag, UBFF secretary Therese Yuphangco, NAC International world champion Marek Olejniczak sa Germany, Danny Cordero, UBFF coordinator sa Middle East, Maximum Muscle Magazine pinaagi sa ilang editor-in-chief Rocky Dauden ug national bodybuilding coach Dondon Cortuna.