Red team pabiling walay pilde sa Sunday Club cagefest

CEBU, Philippines - Miagi una og overtime ang Red team sa wala pa nila maangkon ang makutas nga kadaugan batok sa White team, 96-91 sa nagpadayong Sunday Club 6th Founding Anniversary League basketball tournament didto sa San Roque Parish gym sa barangay Subangdaku, Mandaue City.  

Modaog na unta ang White dihang naglabaw sila og tres puntos, 82-79 sa nahabiling otso segundos sa regulasyon, apan nahanaw ang maong kahigayonan human nila gi-foul si Paul Miñoza. Ang marunong nga si Miñoza mipasud sa iyang unang free throw, apan iyang gisipyat ang ikaduha  ug salamat ni Hanzel Fick, nakuha ang rebound dayon itsa hinungdan sa overtime, 82-all.  

Sa dugang singko minutos, ang Red mao na ang nidiktar sa duwa uban ang paglusad og 9-0 run aron moposte'g 91-82 sa nahabilin 2:26 sa maong aksiyon.  

Si Glenn Ramirez miposa'g 13 puntos aron mahimong topscorer sa Red nga gipaluyohan sa SDC. Daku sab natampo silang Miñoza, Niño Villarin ug Renato Conahap nga pulos miantog og 12 puntos alang sa Red nga wala pay pilde sa tulo nila ka duwa.  

Naglabaw ang White sa halftime, 50-37, apan gikalingawan kini'g kitkit sa Red uban sa "back-to-back" three pointers ni Ricric Fontanosa ug nasundan og laing tres gikan ni Arnel Colanse aron mapahakan pa ang labaw ngadto na lang sa sayes puntos sa tunga-tungang bahin sa third period, 56-50.  

Ang White nga nakatilaw sa ilang ikaduhang sunod-sunod nga pilde gipangulohan sab ni Abner Ona pinaagi sa iyang 23 puntos, laing upat niya ka teammates ang miiskor sab og double figures.  

Sa pasiunang duwa, ang Violet miiskor na sab og daog, ning higayona batok sa Orange, 70-64.  

Ang Violet ug Orange pareho karong nagtangag og 2-1 nga baraha ning maong torneyo.

PUNTOS MATAG USA

Unang duwa:

VIOLET (70) – Rosaroso 13, Ontong 12,  Andrew 10, Sagayno 7, Gabison 6, Carpina 6, Adrian 4, Gonzaga 3, Pacencia 2, Pestaño 2, Camargo 2, Flores 2, Duhaylungsod 1.  

ORANGE (64) – Ipili 17, Tecson 12, Ortiz 11, Gonzaga 10, Labares 4, Perolino 4, Cariño 3, Viacrusis 2, Monching 1.

Ikaduhang duwa:  

RED (96) – Ramirez 13, Villarin 12, Miñoza 12, Conahap 12, Colanse 9, Fick 9, Castro 9, Fontanosa 6, Castañeda 6, Migallen 3.

WHITE (91) – Ona 23, Obijanda 16, Abaño 13, Cabase 11, Hucamis 10, Alvarado 7, Baloro 5, Aposaga 4, Lipogpog. (BANAT PALARO)