Red, Maroon subha'g daog

CEBU, Philippines - Makabungog nga kadaugan ang  gihimo sa Red team dihang ilang gilubong ang Green team, 82-53 sa pormal nga pagsugod sa duwa sa Sunday Club 8th Founding Anniversary League basketball tournament niadtong Domingo didto sa San Roque Parish gym sa Brgy. Subangdaku, Mandaue City.

Sayo kaayong  nakapanimaho og daog ang Red team human sila moposte'g 28-9 nga labaw pagtapos  sa first quarter ug miburot pa ang labaw ngadto sa 24 puntos sa halftime,  44-20.

  Bisan giunsa pa sa Green team sa pagpaningkamot, wala gyud sila makagukod hangtod na lang nahurot ang oras sa duwa.

Sila si Renato Conahap ug Arnel Colanse maoy responsabli sa kadaugan nga miiskor og 16 ug 12 puntos matag usa.

Maayo sab hinuon pagkabahin ang puntos sa Red team kay 13 sa 15 sa ilang mga magduduwa ang nakaiskor.

Ang napaksit nga Green team gipangulohan ni Benjie Pelarios nga miantog og 12 puntos, gisundan ni Jesus 'B-Jess' Bacunawa nga mihirit og 11 puntos.

Sa laing aksiyon, gisubhan sab og daog ang Maroon team pinaagi sa paglubong sa Violet team, 95-79.

Si Benito Aton Jr. mikadlit og 24 puntos, samtang si Eric Obra mitikdol og 14 puntos alang sa Maroon team nga miposte'g 50-37 nga bentaha sa halftime.

Napildeng Violet team gipangulohan ni A. Ontong, kinsa mitali og 18 puntos. Gipaluyohan sab siya ni A. Gonzaga nga adunay 15 puntos.

PUNTOS MATAG USA

Unang duwa:

MAROON (95) – Aton 24, Obra 14, E. Colina 8, Pilapil 6, Anghay 6, Aniñon 5, Rodriguez 5, Cortes 4, Ontog 4, Cabunilas 4, A. Tecson 4, Labastida 2.

VIOLET (79) – Ontong 18, Gonzaga 15, Rosaroso 9, Duhaylungsod 6, Sagayno 6, Auxtero 6, Camargo 6, Flores 5, M. Colina 2, Gabison 2, Carpina 2, Pestaño 2.

Ikaduhang duwa:

RED (82) – Conahap 16, Colanse 12, Ramirez 8, Miñoza 7, Survilla 6, Fick 6, Amora 4, Arreglo 4, Dy 2, Migallen 2, Fontanoza 2, Villarin 2, Castañeda 2.

GREEN (53) – Pelarios 12, Bacunawa 11, Menaling 9, Pescante 6, Gingco 4, Dumoran 4, Miñoza 2, Rivas 2, Abatayo 2, Atillo. (BANAT PALARO)