Gilas makakalaban si Toroman sa Wuhan

MANILA, Philippines - Ang dating Gilas coach na si Rajko Toroman ang mauupo bilang coach ng Jordan sa gaganaping 5th FIBA Asia Cup sa Wuhan, China mula Hulyo 11 hanggang 19.

Ang 59-anyos na si Toroman na siyang bumuo sa konsepto ng Gilas noong 2008, ang dumiskarte para sa Jordan nang winalis ang West Asia Basketball Association championships sa Amman.

Dalawang slot ang ibinigay sa West Asia at makakasama ng Jordan ang Iran. Ang iba pang kasali ay ang Pilipinas at Singapore mula South East Asia, Chinese Taipei at Japan mula East Asia at India mula South Asia.

Dalawang puwesto na lamang ang pinaglalabanan at ito ay para sa Central Asia at Gulf.

Ang Qatar, Bahrain at Saudi Arabia ang naglalaban-laban sa Gulf habang ang Kazakhstan at Uzbekistan ang pinagpipilian sa Central Asia.

Si Chot Reyes ang siyang hahawak sa Gilas at ibibigay niya ang 24-man line up sa organizers sa Hunyo 11. Ang Final 12 ay malalaman sa Hulyo 2.