ESS mibangon, Ynah na lukapa

CEBU, Philippines - Mibalik na sab ang tinuoray nga matang sa duwa nilang Ramil Aniñon ug dangug nga point guard nga si Kenneth Maningo kinsa maoy nagtimon sa opensa sa Enforcement Security Service (ESS) ni playing coach Boodie Monteño kinsang team misikwate sa Ecu Line sa iskor, 90-80 kaniadtong Huwebes sa gabii atol sa nagpadayon nga 2nd BOC-CIPU Cup basketball tournament didto sa barangay Tinago gym, ning dakbayan.

Sa laing duwa, opisyal nga mikulit sa ilang kadaugan sa hardcourt ang Alin Brokers ni team owner Israel Alin kinsa mipakurat sa Ynah Brokers sa iskor, 93-84. Mao lang kadto'y ikaduhang daog sa Alin sa ilang walo ka duwa (2-6) diin ang usa niini pinaagi sa forfeiture.

Gidominar ni Aniñon ang ilawom ug sa iyang duha ka bukton igo lang mokapyot ang ilang mga kontra aron maoy mangu sa opensa sa iyang 27 puntos samtang walay nakadakop sa lusot-lusot ni Maningo kinsa mihakot og 16 puntos.

Laing mga teammates nga mibahug og double figures mao silang Andrew Yu sa iyang 18 puntos ug si Monteño kisa mitikdol og 10 puntos. Ang ESS aduna karo'y 4-3 nga baraha.

Upat sab ka players sa Ecu Line (3-4) ang miiskor og double figures.

Sa laing bahin, miburak og 26 puntos si Edwin Ertorgio ug giabagan siya ni Alin kinsa miantog og 18 puntos sa labing maayo niyang performance karong tuiga. Pareho sab miamot og 16 puntos matag usa silang Ryan Villomo ug Ryan Barral alang sa Alin Brokers.

Si Glenn Allerite maoy nangu sa 2-4 nga Ynah sa iyang 17 puntos samtang midugang og 11 puntos si Jef "Dwyane Wade" Garcia.

Puntos matag usa:

First Game:

ESS (90) –  Aniñon 27, Yu 18, Maningo 16, Monteño 10, Gabica 7, Mose 6, Cañete 2, Gacilos 2.

Ecu Line (80) – Maunes 20, Castillo 16, Singson 13, Into 10, Guardinao 6, Alaan 5, Mondin 2, Sasing 2, Olmedo 2.

Second Game:

Alin Brokers (93) –   Estorgio 26, I. Alin 18, Villomo 16, Barral 16, Lleve 10, Javellana 4, Quiros 4, Alimoren 2.

Ynah Brokers (84) –    Allerite 17, Garcia 11, Lobitaña 11, Guirit 9, Oporto 8, Peras 8, Niones 6, Carmen 3, Gaspe 3, Laurel 3, Villarin 2. – (BANAT PALARO)