Blue, White midaog na sab

CEBU, Philippines - Diriyot madisgrasya ang topseed White team resulta sa ilang dakung kompiyansa batok sa undermanned nga Gray team sa elimination round sa SRP Sunday Club Christmas League 2013 basketball tournament niadtong Domingo didto sa Brgy. Subangdaku, Mandaue City.

 Ang White nakabangon gikan sa makalilisang nga lubong ug munasginhawa nga midaog, 85-84 aron mapanalipdan ang  limpiyo nilang rekord.

 Lahi sa nangagi nilang mga duwa, ang  White nga adunay 6-0 nga baraha naglisud sa pakigsangka sa Gray kay sila ang kanunay'ng naggukod sa unang tulo ka kuwarter.

 Ang White gilubong og 20 puntos, 9-29 paghuman sa unang 10 minutos sa duwa ug namintinar sa Gray ang double digits nilang labaw luyo sa pagtimon nilang Romy Rosaroso ug Badilles hangtod sa himalatyong oras sa third period.

 Ang tira ni Alex Cabase maoy mipalabaw sa White sa labing unang higayon,  69-68 dayong tak-op sa maong kuwarter.

 Sa tuyo nga dili mabulingan ang ilang rekord, ang White sa giya nilang Ohing Ortiz,  Robert Sagayno ug kanhi UV Green Lancer Rene Grafe hinay-hinay miinat sa labaw, 81-78 sa nahabiling 3:30 sa fourth period.

 Si Ortiz nga pwerteng inita sa duwa maoy topscorer sa White pinaagi sa iyang 18 puntos, samtang si Cabase miabuno'g 14 puntos. Sila si Glen 'Dodod' Colina ug Adrian Auxtero mikabkab og 10 puntos matag usa alang sa  White nga makigpinaksitay sa Maroon (6-0) karong Domingo.

 Ang Gray gipangulohan ni Rosaroso, kinsa mipabuhagay og 34 puntos, gisundan ni Badilles nga mitimang og 23 puntos. Mikiat sab si Emilio Colina, apan wala kini makatiwas sa duwa sa nahabiling mga minutos sa  final quarter kay nagisi ang ubos nga bahin sa wala niyang mata  human magkabangga sa iyang teammate samtang nag-ilog sa bola. Si Colina mitapos sa duwa bitbit ang 13 puntos.

 Sa pasiunang duwa, ang defending champion Blue team nakaipsot sa kulbahinam nga duwa batok sa Green, 87-71 sa pagpangulo ni Ramon  Fontanosa, kinsa mipatuasik og 24 puntos, lakip na ang tulo ka three-point shots.

 Misalida dayon si Larry Lauron diin miposa kini og duha ka sunod-sunod nga three-point shots aron hatagan ang Green team og 6-2 nga bentaha sa sayong bahin sa duwa.

 Pirmeng naggukod ang Blue hangtod nga  nakatabla, 41-all human sa basket ni Buddy Alesna.

 Human magtabla, ang  White  sa kombinasyon nilang Fontanosa, Alesna ug Dante Orendain mao na nidominar sa duwa.

 Si Orendain mitikdol og 18 puntos, samtang si Alesna mitimang og 12 puntos.

 Si Lauron mikimada og 20 puntos aron pangulohan ang Green, samtang si Abaño nga gidemalas sa final period mipupo'g 16 puntos ug si Gideon Ipili miani og 11 puntos.

 Ang mga duwa gidumala ni league commissioner Monching Menaling sa abag nilang Juvenal Perolino, Van-Van Amora, Zaldo Montayre, Paul Miñoza ug Pedro Montayre ug BAP referee Noriel Lacsa.

 Ang tinuig nga liga ubos sa pagdumala sa ilang presidente Rom  Castañeda gisuportahan sab  ni  Subangdaku Brgy. Capt. Ernie Manatad ug councilor Amay Dy.

PUNTOS MATAG USA

Unang duwa:

 BLUE (87) - Fontanosa 24, Orendain 18, Alesna 12, Labares 6, Gonzaga 5, Medio 4, Colanse 4, Enriquez 4, Lipogpog 2, Povadora 2, Postell 2, Paldo 2.

 GREEN (71) - Lauron 20, Abaño 16, Ipili 11, Cortes 8, Auxtero 6, Bacunawa 5, Feniza 2, Cabrillas 2, Rico 2.

Ikaduhang duwa:

 WHITE (85) - Ortiz 18, Cabase 14, Colina 10, Auxtero 10, Cabcaban 6, Sagayno 6, Abatayo 6, Pescante 6,  Grafe 4, Atillo 3, Ompad 2.

 GRAY (84) - Rosaroso 34, Badilles 23, Colina 13, Camargo 8, Ceniza 4, Menaling 2.