Poblacion Occ. sud sa finals

CEBU, Philippines - Nagpauwan og mga puntos ang Poblacion Occidental sa second half aron lumsan ang Cansaga, 85-65 ug ingon man moabante sa finals sa Inter-Barangay division sa 3rd Mayor Teresa 'Nene' P. Alegado Fiesta Cup basketball tournament didto sa Brgy. Jugan open court.

 Ang Poblacion Occidental naglabaw sa halftime, 43-41, apan kalit lang migana ang ilang opensa sa katapusang duha ka kuwarter hinungdan nga miposte sila'g 20 puntos nga kadaugan.

 Atubangon sa Poblacion ang modaog sa laing semifinals duel tali sa Pulpogan ug Lamac. Ang Lamac mipugos sa usa ka sudden-death match human nila mapilde ang Pulpogan, 82-76.

 Moabot ngadto sa 21 ka mga barangays ang misalmot sa usa ka buwan nga torneyo nga usa sa mga highlights sa pagsaulog sa tinuig nga kapistahan sa Consolacion pahinungod sa ilang mahal nga patron San Narciso karong Oktubre 29.

 Ang tinuig nga liga gipaluyohan ni Consolacion Mayor Teresa P. Alegado, Vice Mayor Rey Damole ug mga sakop sa Sangguniang Bayan. (BANAT PALARO)