MP Customs hari sa AMBL Cup
CEBU, Philippines - Gisalbar ni ex-pro Montoy Singson ang MP Customs kansang lay-up maoy naghatag sa ilang 88-87 nga kadaugan batok sa Team Rama aron sakmiton ang korona sa 2013 AMBL Cup basketball tournament niadtong Martes sa gabii didto sa Vicente Sotto Memorial gym sa barangay Punta Princesa, ning dakbayan.
Labaw unta og usa ka lugas ang Team Rama sa nahabiling 30 segundos sa duwa, apan si ex-pro Lou Regidor nakakawat og bola gikan ni Ope Abellana ug dayong pasa ngadto kang Singson alang sa winning basket.
Silang Regidor ug Gastador maoy nangu sa MP Customs ni Marty Pimentel sa ilang 24 ug 20 puntos matag usa, samtang silang Singson ug Roy Arnado nagkumboya'g 27 puntos.
Si Abellana maoy nangu sa Team Rama sa iyang 21 puntos, gisundan sa higanteng si Bonel Balingit nga adunay 20 puntos, samtang si Danny Aying midugang og 16 puntos.
Sa sayo pa, ang RCAF ni Romy Faunillan mibuntog sa Blessel Enterprises ni Edgar Camota, 111-105 aron maangkon ang third place trophy.
Ang sentro sa RCAF nga si Epon Nacua nagmangtas sa final period diin mirehistro og 23 puntos alang sa iyang game-high 32 puntos aron pangulohan ang kadaugan. Silang Alwin Tabasa ug Jun Sumargo miamot og 15 puntos matag usa.
Silang Frankie Lastimoso, Ralph Bruzon ug Erwin Ferrer parehong miiskor og 20 puntos aron pangulohan ang Blessel Enterprises.
Ang AMBL Cup nga gipasiugdahan ni Allan Lim nagmalampuson pinaagi usab sa pagpaluyo sa Du Ek Sam (DES) Inc. ug sa LG Appliance Master.
PUNTOS MATAG USA
Unang duwa:
RCAF (111) - Nacua 32, Tabasa 22, Sumargo 15, Garcia 11, Baclay 8, Dinampo 8, Ciabo 7, Del Campo 6, Ybañez 2
BLESSEL (105) - Lastimoso 20, Bruzon 20, Ferrer 20, Ortega 15, Birao 10, Galon 10, Ocampo 8, Grafe 2
Ikaduhang duwa:
MP CUSTOMS (88) - Regidor 24, Gastador 20, Arnado 15, Singson 12, Sausa 6, Hapin 4, Pua 3, Mata 2, Belicario 2
TEAM RAMA (87) - Abellana 21, Balingit 20, Aying 16, Rama 10, L. Fuentes 4, Navarro 4, A. Fuentes 3, Pahamutang 3, Balaba 2, Dejos 2, Vidal 2 (BANAT PALARO)
- Latest
