UST daog sa double O.T.

CEBU, Philippines - Bisa'g wala makaduwa alang sa University of Santo Tomas (UST)   Growling Tigers ang ilang top gunner nga si Jeric Teng, wala gihapon sila magpalupig ug ilang gipukan ang Far Eastern University (FEU) Tamaraws human sa usa ka kulba-hinam kaayong double overtime sa iskor, 79-78 atol sa nagpadayong UAAP Season 76 men's basketball kagahapon didto sa Smart-Araneta Colisuem.

Si Karim Abdul maoy nagtimon sa kadaugan sa Growling Tigers pinaagi sa iyang game-high 24 puntos ug ang singko puntos  niadto didto gikan sa overtime. Mihakot sab og 12 ka rebounds si Abdul nga usa ka import gikan sa Cameroon.

Usa ka block shot ni Abdul sa daginotong oras sa duwa maoy nagsalbar kanila aron sila moabante ngadto sa ika-limang pwesto sa ilang  6-5 nga baraha.

Tungod sa maong kadaugan, misamot kadako ang purohan sa Growling Tigers nga molandig sa Top Four depende lang sab sa resulta sa umaabot nilang mga duwa.

Nakakuha sab og dakung suporta si Abdul gikan sa iyang mga teammates ilabi na kanilang Kevin Ferrer ug Edward Daquiaog. Nakabawos ang Growling Tigers sa ilang 67-77 nga kapildehan sa Tamaraws sa first round niadtong Hulyo 21.

Sa maong kadaugan sa Growling Tigers, midailos sa ikaduhang pwesto ang Tamaraws ug mao nay nag-una karon ang National University (NU) Bulldogs.  Ang Tamaraws naghupot na karon og 8-4 nga baraha ug biya'g usa ka daog tali sa nagkainit nga Bulldogs.

Si Terrence Romeo maoy nangu sa Tamaraws sa iyang 19 puntos apan wala siya'y nahimo sulod sa kataposang singko minutos sa duwa.

Medyo nakakuha na karon og dakung momentum si Abdul ug makaayo kini sa kampanya sa  UST.

Kanhi sakop sa Mythical Team sa miaging tuig, ang 6-foot-6 nga si Abdul mao nay naningkamot dihang nameligro ang iyang team ug nagkinahanglan og maayo sa iyang opensa.

Human sa iyang singko puntos sa double overtime, si Abdul maoy nagpalabaw sa Growling Tigers pinaagi sa usa ka three-point play, 79-76 sa nahibiling 32.3 segundos.

Wala madugay, iyang natapalan si Mac Belo dapit sa baseline aron pagselyado sa kadaugan. (BANAT SPORTS)