Cebu Landmasters sa semis

CEBU, Philippines - Midaug pinaagi sa overtime ang no. 4 Cebu Landmasters-USC aron moabante sa semifinals human ilang gipalagpot ang no. 5 seed Lion Tiger-USPF, 93-88 niadtong Sabado sa nagpadayong Enervon CESAFI Partner's Cup 2013 basketball tournament didto sa Cebu Coliseum.

Naghupot og twice-to-beat incentive ang Cebu Landmasters batok sa Lion Tiger ug sila maoy makigsangka batok sa no. 1 ug defending champion Prime Asia Lending Corp.-UV ugma atol sa pagsugod sa single round robin semifinal series.

Nakumpleto ang semifinals human sab midaug ang no. 3 seed San Marino Tuna-CIT-U batok sa no. 6 Raphael's Cafe-USJR, 81-63 ug maoy makigsangka batok sa no.2 seed Gaisano Capital South-UC ugma.

Kanunay naglabaw ang Cebu Landmasters ug sila sab maoy nagkontrolar sa duwa. Milabaw sila'g labing menos 14 puntos, 64-50 pagkahuman sa third period.

Si Joseph Sedurifa kinsa mibahug og 37 puntos alang sa Lion Tiger, maoy mihatud sa duwa ngadto sa overtime pinaagi sa iyang three-point shot sa nahibiling 5.9 segundos sa duwa.

Kinahanglan lang unta nga hutdon sa Cebu Landmasters ang nahibiling 14 segundos aron modaug apan ilang gitugotan nga makakuha'g laing ball possession ang Lion Tiger ug natabla kini ni Sedurifa sa 79-all.

Si Sedurifa sab maoy mihatag sa labaw ngadto sa Lion Tiger, 81-79 pagsugod sa overtime period nga kabahin sa iyang makapa-isa sa kilay nga 37 puntos nga maoy iyang career-high.

Hinoon wala na makahuygo ang Lion Tiger didto sa overtime ug tataw kaayong gikapoy na sab si Sedurifa kinsa nakasinati og cramp.

Na-foul out alang sa Cebu Landmasters ang ilang Cameroonian import nga si Ahmed Salihou kinsa igo lang mihimo'g sayis puntos.

Silang Ian Ortega ug Nico Magat maoy nanginit didto sa overtime period aron molampos ang Cebu Landmasters.

Mibahug og 19 puntos si Stephen Que samtang midugang og 18 ug 17 puntos matag usa silang Charles Pepito ug Magat samtang miamot og 11 puntos si Christian Laude.

Nakatampo sab sa opensa sa Lion Tiger silang Art Camello ug Lawrence Escanilla kinsa miposa og 17 ug 16 puntos, matag usa.

Puntos matag usa:

Cebu Landmasters-USC (93): Que 19, Pepito 18, Magat 17, Laude 11, Ortega 9, Salihou 6, Ypil 4, Rabat 4, Guardiario 3, Romaguera 2.

Lion Tiger-USPF (88): Sedurifa 37, Camello 17, Escanilla 16, Batucan 8, Mangaron 3, Virtucio 3, Borces 3, Sollano 2. (BANAT PALARO)