Happy New Year 2013 "Year of the Water Snake"

CEBU, Philippines -  Tungod kay dako kaayo'g gikatabang sa atong pamantalaan ang atong mga suking tigbasahan sa Banat Sports, akong pahimuslan kining higayona sa pagpadayag sa akong kinasing-kasing nga pagtimbaya kaninyong tanan ug mo-ingon ako "Bulahang Bag-ong Tuig kanatong tanan uban sa panghinaut nga unta makaangkon kita'g dugang grasya sa 2013 ug ingon man sab himsug nga panglawas."

Bisan og menos tingali ang atong nadawat nga grasya ning tuiga atol sa panahon sa Pasko ug sa Bag-ong Tuig, dili kini nato igsapayan tungod kay ang mas importante nga maayo kanunay ang atong lawas aron makapadayon kita pagpanikaysikay sa matag adlaw natong buluhaton.

Gani, angay kitang magpasalamat sa atong Magbubuhat nga kanunay kita niyang giampingan ug giluwas sa mga katalagman dili susama sa nahitabo didto sa Compostela Valley ug sa Cateel, Davao Oriental nga nabiktima sa kusog nga baha nga dala sa bagyong Pablo.

Dili na tingali kini nato paburoton pa'g maayo ug tugoti na lang ako ninyo nga hisgotan ang mga pipila ka mga dagkong panghitabo sa natad sa sports o paugnat sa kusog nga ato nang nasayran sa miaging pipila ka adlaw ug pipila lang niini ang akong napilian.

Ambot kung duna bay usa ka Pilipino o bisan kinsang boxing fan sa tibuok kalibotan nga ang knockout nga nahiagoman ni Manny Pacquiao maoy labing dakung balita karong tuiga.Gani napili man kining knockout of the year sa international sports television channel nga ESPN.

Dihang nahagba si Pacquio sa wala pa mahuman ang ika-unom ka round gikan sa tuong kumo ni Juan Manuel Marquez sa ilang ika-upat nga panagbagat, dugay sab kitang wala makalihok ug daw sa mihunong og tuyok ang kalibotan.

    Atong makumparar ang maong sitwasyon sa usa ka kandilang giugbok nga dili na sab molihok ug niadtong nagbarug nga nitan-aw sa television, dugay nakalihok ug niadtong naglingkod samtang nagtan-aw sa away, diriyot sab mahug sa ilang lingkoranan.

    Ang ikaduha nakong napilian mao ang pagtumba ni Nonito "The Filipino Flash" Donaire kang Jorge Arce sa wala pa mahuman ang ikatulong round. Si Donaire maoy napili nga Fighter of the Year sa ESPN karong tuiga.

    Wala magtuo si Arce nga mao kadto'y iyang dangatan ug tungod sa maong kapildehan, napugos siya'g retiro sa boxing.

Ang ikatulong dakung kalamboan sa sports mao ang pag-abante sa Philippine Azkals sa semifinals sa AFF Suzuki Cup sa ikaduhang higayon nga una nilang nahimo niadtong 2010 apan wala kita'y swerte kay natagak man kita batok sa Singapore nga mao sab ang nahimong kampiyon dihang midaug sila batok sa Thailand.

Ang ikaupat mao ang pagsakmit sa SWU Cobras sa korona sa CESAFI 2012 sa labing unang higayon.

Tulo pa lang ka teams sukad sa 2001 ang nahimong kampiyon sa CESAFI... Siyam ka higayon ang UV Green Lancers ug duha ka higayon ang UC Webmasters.

Sa NBA, atong hatagan og pagtagad kining top five sports yearender nga atong nakutlo gikan sa internet.

Ang una mao ang pagbalhin sa New Jersey Nets ngadto sa Brooklyn, New York sukad natukod ang maong franchise sa tuig 1957.

Ang ikaduha mao ang pagpalagpot sa L.A. Lakers coach nga si Mike Brown human lang sa lima ka duwa sa regular season dihang nagsugod ang Lakers sa 1-4 nga baraha.

Ang ikatulo mao ang pagbalhin ni Dwight Howard gikan sa Orlando Magic ngadto na sa Lakers.

Ang ikaupat mao ang pagsulbong sa career ni LeBron James diin gitandi na siya ni Michael Jordan kinsa midaug og korona sa NBA, nahimong NBA Finals MVP ug midaug og gold medal sa Olympic sa mao rang tuig.

Ang ikalima mao ang pagsikat sa American-Taiwanese nga si Jeremy Lin didto sa New York City diin nahimugso ang Linsanity Fever.

MISCELLANEOUS. HAPPY NEW YEAR to my family members--- Gingging, Matt and Nicole and also to my relatives, friends and colleagues in the media profession. My friend Britt Reroma, the champion coach for San Beda Red Cubs is in town and he handed to me his Christmas gifts... of course, a Red Cubs championship t-shirts. Thanks a lot to all those who made my Christmas holidays wonderful.    (BANAT NEWS)