Pinoy Cuppers tumabla sa Indons sa 1-1
MANILA, Philippines - Pinangatawanan nina Treat Huey at Christopher Rungkat ang pagiging number one players ng Pilipinas at Indonesia nang kunin ang panalo sa mga singles matches sa pagbubukas ng 2012 Asia Ocenia Zone Group II Davis Cup Finals kahapon na ginawa sa Gelora Bung Karno Tennis Stadium sa Jakarta, Indonesia.
Nagpakita ng solidong serves si Huey tungo sa 6-4, 6-2, 6-3 panalo laban kay Elbert Sie upang pawiin ang kinuhang 7-6 (4), 6-2, 3-6, 6-0, tagumpay ni Rungkat kay Francis Casey Alcantara sa unang laro.
Inasahan naman ng bisitang national Davis Cupper na matatablahan nila ang host sa unang araw ng torneo at ngayon ay pupuntiryahin na makuha ang doubles para sa mahalagang 2-1 bentahe sa best of five series.
Nominado sina Fil-Am Ruben Gonzales at Jeson Patrombon pero papalitan si Patrombon ni Huey na mas mahusay sa doubles.
Haharapin nila sina Rungkat at Sie at aasahan na pagod ang dalawa matapos mapalaban sa opening singles.
Ang mananalo sa larong ito ngayon ay magkakaroon ng dalawang pagkakataon upang makuha ang tie sa reversed singles.
Mapo-promote sa Group I ang mananalo sa 2013 habang mananatili sa Group II ang matatalo.
- Latest
- Trending
