Melligen midaog pinaagi sa puntos

CEBU, Philippines - Midaog pinaagi sa puntos si John Rey Melligen batok ni Elmo Traya sa ilang sangka sa Mayor Jonas Cortes Cup "Boxing At the Park" sa miaging gabii diha sa Mandaue City Plaza Square.

Human sa sunod-sunod niya nga kapildihan sa Summit Amateur boxing series, namawi ang taga-Bacolod nga si Melligen ug iyang gidabodabohan ang Batang Lacion nga si Traya aron mopatigbabaw sa ilang away ubos sa 58 kgs. class.

Laing taga-Bacolod nga si JP Atienda ang midaog sab pinaagi sa pagpilde ni Rolando Lingaw-Lingaw sa Bukdinon.

Giunay sab og pilde ni Rebel Reyes ang iyang teammate sa Cabancalan Elementary School nga si Ighan Noveno, nag-away sab ang Cabancalan boxers diin si Ferde San Roque maoy midaog batok ni JK Malupay pinaagi sa puntos, 3-0.

Managlahing kapalaran ang gidangatan sa managsuong Dignos nga sila si Welmark ug Melmark. Si Welmark nasugamak ngadto ni Jimboy Mayang, samtang si Melmark midaog batok ni Benjic Manatad.

Lain pang nidaog mao sila si Ramil Castañares, Mardy Muaña, Janriel Jecong, Rommel Tuñacao ug  Margarito Moya. (BANATSPORTS)