LLBA 1, Gemmary Pawnshop midaog sa LLBA Rollway Cup

CEBU, Philippines - Gipanamastamasan sa LLBA 1 squad ug walay puangod nga milubong sa Sunday Club, 100-81 sa ilang engkuwentro sa LLBA Rollway Friendly Interclub basketball tournament didto sa Villas Magallanes gym sa Lapu-Lapu City.

Gipahimuslan gyud og maayo ni Lito Magat ang iyang gidak-on diin mihabwa siya'g 31 puntos aron pangulohan ang LLBA 1 nga maoy mikontrolar sa kinatibuk-ang duwa.

Laing upat ka players ang mikulit sab og double figures alang sa LLBA 1 nilang team owners Allan Yu ug Michael Ouano. Si Tata Bardago mitampo og 23 puntos, gisundan ni Glenn Aying sa iyang 15 puntos, Yu   nga adunay 12 puntos ug Medina nga igo gyud nakaabot og 10 puntos.

Ang Sunday Club ni team manager Rolly dela Pieza, gipangulohan ni Allan Sepe, kinsa mibagdok og 33 puntos.

Sa laing duwa, milansang sab og daog ang Gemmary Pawnshop pinaagi sa paglubong sa BSBA sa iskor nga 83-65.

Ang kanhi UC Webmaster point guard nga si Raymond Yncierto mi-iskor og 21 puntos ug maoy topscorer sa Gemmary Pawnshop, kinsa nakapanimaho na og daog sa fourth quarter. Samtang si Pompie Ngujo mao sab ang nangulo sa pilderong BSBA pinaagi sa iyang 31 puntos.

Puntos Mata Usa

Unang duwa:

LLBA 1 (100) - Magat 31, Bardago 23, Aying 15, Yu 12, Medina 10, Ouano 7

SUNDAY CLUB (81) - Sepe 33, Inso 23, Llenes 4, Brañanola 4, Palad 4, Almacin 4, Aparante 3, Cortes 2

Ikaduhang duwa:

GEMMARY PAWNSHOP (83) - Yncierto 21, Eya 14, Salimbangon 9, Gabigas 8, Medina 7, Gastador 6, Godinez 6, Hermo 6, A. Medina 6

BSBA (65) - Ngujo 31, Versoza 10, Sayson 6, Aviles 5, Enriquez 4, Giganto 4, Catag-catag 4, Godinez 3. – BANAT NEWS