Bostolits, ICC Pharmacy mi-abante sa semifinals

CEBU, Philippines - Midaog gihapon ang Bostolits bisan wala moduwa ang ilang team captain nga si Rey Petiluna dihang ilang gipilde ang MD Pimentel Customs Brokerage, 83-81 aron pag-abante sa semifinal round sa Saturday Club basketball tournament diha sa barangay Quiot Sports Complex, ning siyudad.

Ang Bostolits, milabaw lang og kuwatro puntos sa first quarter, 21-17, apan hinay-hinay kini nilang giinat ug miabot ngadto sa 16 puntos sa halftime, 45-29.

Sa wala damha, ang MD Pimentel kalit lang mi-rally sa third period aron makibhangan ang labaw, 53-62 ubos sa liderato ni power forward Richard Gubaton.

Si Gubaton mao sab ang responsabli pagtabla sa duwa, 81-all pinaagi sa iyang duha ka free throws sa nahabiling sayes segundos sa duwa.

Apan wala makabantay ang Pimentel Brokers sa hapos ngadto sa pikas goal ni playmaker Michael Malalay ngadto kang Roma, kinsa mipasulod sa iyang buzzer-beating lay-up aron aswaton ang iyang koponan.

Si Roma maoy nangulo sa Bostolits, pinaagi sa iyang 21 puntos, samtang sila si Lito Masayas ug Malalay nagkumboya og 30 puntos ug si Budak Santiago midugang og 13 puntos.

Ang Pimentel Brokers gipangulohan ni Gubaton, kinsa mihakot og 27 puntos, gisundan ni Glen Allerita nga adunay 20 puntos.

Sa sayo pa, ang ICC Pharmacy milubong sab sa St. Vincent sa iskor nba 96-73 luyo sa paningkamot nilang Loloy Villaren ug Roebucks Lasque nga nagkumboya og 37 puntos.

Ang kadaugan sa Bostolits ug ICC Pharmacy maoy mikompleto sa baraha sa semifinals uban sa Our Lady of Fatima ug H &C Sand and Gravel Dealer. 

Puntos Matag Usa

Unang duwa:

ICC Pharmacy (96) - Villaren 20, Lasque 17, Francisco 11, Arsola 10, Palma 10, Ehrol 10, N. Celestial 8, Dela Peña 8, B. Celestial 2

St. Vincent (73) - Sevellejo 22, Trazona 21, McFritz 8, Abellar 8, Español 5, L. Dela Peña 4, Ararao 3, Leopats 2

Ikaduhang duwa;

Bostolits (83) - Roma 21, Masays 16, Malalay 14, Tantiado 13, Patrimonio 9, Bonbon 2, Eismar 2, Palanas 2, Naces 2, Dela Peña 2

Pimentel (81) - Gubaton 27, Allerita 20, Malubay 8, Arguedo 6, Visitas 6, Nards 6,   Gaite 4, Piza 2, Manubag 2. – BANAT NEWS