Niños gihuboan sa korona

CEBU, Philippines - Gihuboan sa korona ug gipakanaog sa ilang trono ang M. Lhuillier Kwarta Padala-Cebu Niños dihang gilubong kini sa Misamis Oriental Meteors, 64-52 sa tinaktakay nga duwa sa ilang "best-of-five" final series sa Smart-Liga Pilipinas Conference II championship kagabii diha sa Cebu Coliseum.

 Sa maong kadaugan, ang Meteors ni Gov. Oscar Moreno ug coach Jun Noel mao na ang bag-ong hari sa kinatibuk-ang Liga Pilipinas.

Ang Meteors wala moila og balwarte sa kontra ug ila nga giisip ang Cebu Coliseum nga ilang nataran diin mipauwan kini'g mga puntos. Kay samtang nanglimbasog ang Cebu Niños, ang Meteors migara sab sa pagpasulod sa ilang mga opensa nga nakagusbat sa duwa sa mga batos ni coach Raul 'Yayoy' Alcoseba.

Ang walay puas nga depensa nga gipatuman sa Meteors sa ikatulong kuwarter mao sab ang naguba sa set plays sa Cebu Niños. Ang Meteors mipauwan og 26-11 run aron pagposte og 17 nga bentaha, 55-38 paghuman sa maong kuwarter.

Unang nakabentaha ang Cebu Niños dihang milansang kini og 10-5 nga bentaha, apan ang Meteors mibawos aron pag-ilog sa labaw sa iskor nga 17-12.

Ang Cebu Niños alistong miilog sa labaw, 30-29 human masulod ang triple ni Stephen Padilla, apan mao ra kutob ang ilang maayong labok kay si Mark kinsa maoy napiling Conference ug Finals MVP mikudlit og 10 puntos sa gihimong 17-2 rally nga naghatag og 14 puntos nga labaw sa Meteors, 46-32. Mitubo pa ang ilang labaw ngadto na sa 19 puntos, 53-34 sa nahabiling 1:19 sa third quarter.

Gikan niadto, ang Cebu Niños wala na makasikit pag-usab hangtod na sa katapusang gutlo sa duwa.

Si Yee mipupo og 12 puntos, samtang si Joey Mente miani og 10 puntos alang sa Meteors, kinsa mipuhal sa nilangkatay sa Cebu Niños, 36-29.

Si Mark Ababon mao lang ang bugtong player sa Cebu Niños nga nakakuha og double figures pinaagi sa iyang 13 puntos.

PUNTOS MATAG USA

MisOr (64) - Yee 12, Mente 10, Gudez 9, Kong 8, Tagupa 8, Butel 6, Micutuan 5, Bombeo 3, Daja 2

Cebu (52) - Ababon 13, Dacia 8, Basco 7, Santos 6, Padilla 6, Mepaña 4, Aying 2, Enriquez 2 (BANAT NEWS)