Cebu Niños buhi pa

CEBU, Philippines - Nakaginhawa pa ang M. Lhuillier Kwarta Padala-Cebu Niños human makabawos pinaagi sa pagpukan sa bisitang Misamis Oriental Meteors, 62-58 sa Game-4 sa ilang "best-of-five" series sa Smart-Liga Pilipinas Conference II National Finals kagabii diha sa Cebu Coliseum.

Wala mogana ang mga itsa ni Stephen Padilla gikan sa three point area, apan iya kining gibawi sa free-throw line diin nakompleto niya sa pagpasulod ang unom niya ka itsa sa nahabiling 33 segundos sa duwa aron hatagan pa og kinabuhi ang Cebu Niños sa ilang kampanya alang sa korona.

Sa maong kadaugan, ang Cebu Niños ni businessman-sportsman Michel J. Lhuillier ug coach Raul 'Yayoy' Alcoseba nakatabla na sab sa series, 2-2   ug mihatod sa serye ngadto sa tinaktakay nga Game-5 nga gikatakda ugma sa alas-5 sa hapon diha gihapon sa Cebu Coliseum. 

Sama sa miaging tulo nila ka kumbati, sikit kaayo ang maong duwa nga miresulta og siyam ka panagtabla.

Ang Cebu Niños maoy milansang sa ilang kinadak-ang labaw nga otso puntos, 55-47 dihang milusad kini og 11-0 rally sa giya nilang Padilla, Mark Ababon, ug Marlon Basco sa nahabiling 2:25 sa duwa.

Hapit pa madiskuhedo ang Cebu Niños dihang si Jercules Tangkay natawgan og technical foul human milabyog sa iyang siko ngadto ni Joey Mente diin ang Niños nilabaw lang og kuwatro puntos, 56-52 sa nahabiling 45 segundos sa regulasyon. Apan naanghelan pa ang Cebu Niños kay wala makahimo og maayong opensa ang Meteors.

Si Padilla adunay 14 puntos alang sa Cebu Niños, samtang si Basco mitimang og 12 puntos ug si Abby Santos mikimada og 10 puntos.

Si Yee mao lang bugtong player nga nakakuha og double-digit alang sa MisOr nga milugit og 12 puntos.

PUNTOS MATAG USA

Cebu (62) - Padilla 14, Basco 12, Santos 10, Enriquez 8, Tangkay 6, Cavan 4, Ababon 4, Mepaña 4

MisOr (58) - Yee 12, Mente 8, Kong 8, Moreño 7, Daja 7, Micutuan 6, Gudez 6, Butel 2, Bombeo 2   (BANAT NEWS)