Pacquiao-Hatton fight mokita og $58 million

CEBU – Bisan pa og padayon pa lang ang pagpanday sa gikahinamang away batok sa Pinoy boxing superstar Manny “Pacman” Pacquiao batok sa British champion Ricky “Hitman” Hatton karong Mayo 2, si Top Rank Inc. promoter nga si Bob Arum nagkanayon nga mokita ang maong away og $58,198,749 million.

Ang maong blockbuster fight nga usa sa mga giatangan nga boxing event karong tuiga gihugonhugonang muguba sa mga nag-unang rekord sa revenue sa lain pang nag-unang dagkong away, lakip na niini ang kita sa Mayweather Jr.- De la Hoya, Trinidad-De la Hoya ug Pacquiao-De la Hoya fight.

Sa laing bahin, gihingusgan karon sa amahan ug manager ni Ricky nga si Ray Hatton nga didto sa Wembley Arena didto sa Britanya ipahigayon ang maong away. Nagkanayon si Ray nga gusto niya nga sa ilang tugkaran mahitabo ang away kontra sa world pound-for-pound king aron hatagan og kalingawan ang mga taga-Britanya.

Apan ang US cable giant Home Box Office (HBO) nisalikway sa gihangyo sa kampo ni Hatton ug gipadayag nga sa Las Vegas mahitabo ang away.

Matud pa ni Arum nga duha ka venue ang gipilian nila karon , kini mao ang MGM Grand Garden Arena nga adunay 15,000 seating capacity ug ang Thomas and Mack Center nga pwedeng mupalingkod og 19,000 ka mga tumatan-aw.

Gidugang sa amahan ni Hatton nga ipahigayon nila ang tulo ka buwan nga training sugod karong Pebrero sa dili pa sila mulupad ngadto sa Las Vegas karong Marso. (Lemuel P. Maglinte) (BANAT NEWS)