Piniliay sa Cacoy Doce Pares sa Disyembre 30

CEBU - Lain na sab nga termino ang paaboton sa presidente sa Cacoy Doce Pares World Eskrima Federation nga si Ciriaco "Cacoy" Cañete tungod kay gikatakda nga siya gihapon maoy mangu sa ilang grupo atol sa ilang tinuig nga piniliay karong umaabot Disyembre 30 diha sa ilang kampo sa may dalan C. Padilla, ning dakbayan.

Atol sa piniliay, idungan sab pagsaulog ang ilang tinuig nga Christmas party diin adunay pagahimoon nga pasundayag sa mga banggi-itang mga eskrimadors nga sakop sa Doce Pares.

Ang mapili nga mga opisyales uban kang Grandmaster Cacoy, mohurar unya sa Enero 10 sa sunod tuig diha gihapon sa ilang tugkaran.

Human sa iyang taas-taas nga bakasyon dinhi sa Sugbo, si Cacoy molarga na usab padung sa Europe aron pagpahigayon og nagkadaiyang seminar ug busa, iyang menosan ang iyang adlaw sa pagbisita sa Estados Unidos diin kanunay siyang mopuyo didto og unom ka buwan.

Karong Abril 2009, ang 89 anyos nga si Cañete mobisita sa Italy ug sa Germany alang sa seminar ug aduna pay laing lugar sa Europe.

Sa nalambigit nga kalamboan, tulo ka eskrimador nga Australian ug usa ka Brazilian bag-o lang mitapos sa ilang pagbansay-bansay sa Cacoy Doce Pares headquarters ug mibalik na sa tagsa-tagsa nila ka lugar.

Ang tulo ka mga Australian grandmasters mao sila si 10th grade black belter Christopher Nasilowski kinsa maoy tag-iya sa Millenium School of Martial Arts International, Inc., Master Vince Palumbo kinsa maoy tag-iya sa International Combative Martial Arts Academy (ICMAA), Vickie Simos ug ang Brazilian jujitsu champion nga si Leonardo Arruda.

Ang maong torneyo didto sa New Zealand ginganlan og South Pacific Championship ug gipasiugdahan ni Master Leigh Jenkins kinsa usa ka Australian police didto sa Citichurch, New Zealand ug mao sab ang presidente sa New Zealand Council of Kali Eskrima-Arnis Instructors or NZCKEAI.

Usa kadto ka dakung kalihokan nga nahitabo didto sa kasaysayan sa paugnat sa kusog didto sa New Zealand kay mao kadto’y ikaduhang pinakadaku nga tigum ug panagbagat sa mga martial arts experts didtong dapita.

Ang team nila ni Nasilowski ug Palumbo nga gikan sa Adelaide, mihakot og 10 ka gold medals, upat ka silver ug duha ka bronze. – BANAT NEWS