Haraqharaq pormal na gibuksan

Nagmalampuson ang pagbukas sa Atan Guardo Haraqharaq Pasil Basketball Tournament niadtong miaging Sabado diha sa Pasil Sports Complex.

Walo ka koponan ang nisalmot sa maong torneyo nga gipaluyohan sa Arthro Kontra Arhtritis food supplement.

Si kanhi Cebu City Sports Commission (CCSC) chairman Jonathan Guardo, kinsa mao sab ang tag-iya sa Arthro ug Osaka Iridology ug si Pasil Barangay Councilor Mario Bitang maoy nangulo sa pinasidunggang dinapit.

Bisan pa man og dili na siya ang nagpadagan sa mga kalihukan sa nagkadaiyang paugnat sa kusog sa siyudad, si Guardo aktibo lang gihapon paghimo og mga nagkalain-laing sports activities sa mga barangays.

"Pasil is very active in sports. I commend Brgy. Capt. Meot Ocarol for his continued support to Haraqharaq and other basketball groups. Basketball is one way to promote camaraderie and physical fitness among its members," matud pang Guardo.

Si Bitang mapasalamaton kaayo kang Guardo sa gipakitang suporta sa ilang pundok nga tinguhang mopalambo sa paugnat sa kusog.

Ang maong torneyo nagsubay og single round robin format ug ang top two teams maoy makaangkon og katungod nga moduwa sa kampiyonato sa Disyembre 29.