Jewelers sud na's finals

Ang M. Lhuillier Kwarta Padala-Cebu Jewelers nagsandig sa kainit nilang Mike Manigo ug Jayford Rodriguez aron pagbuntog sa Toyota-Iloilo Warriors, 85-72 ug ingon man pag-abante ngadto sa Visayas Division finals sa ML Kwarta Padala Mindanao Visayas Basketball Association (MVBA) First Conference niadtong Biyernes sa gabii didto sa Pototan Astrodome sa Pototan, Iloilo.

Ang Jewelers, nga mao sab ang midaog sa Game-1, 96-78, niadtong Mayo 17 diha sa Cebu Coliseum, mitak-op sa serye sa baraha nga 2-0.

Ang Iloilo igo nakalabaw og dos puntos sa first half, 33-31 ug wala kini magdugay sa mga kamot gumikan kay ang Jewelers ni coach Raul 'Yayoy' Alcoseba nagmangtas sa ikatulong kuwarter aron pagposte og 12 puntos nga labaw, 63-51.

Nagpadayon ang pagpanghasi nilang Manigo ug Rodriguez sa 3-point shooting aron paghatag niini sa Jewelers sa kinadak-an nilang labaw nga 17 puntos, 73-57.

Ang Warriors, pinaagi sa panglimbasog ni Rhagnee Sinco, misuway og gukod apan sila si Rodriguez ug Manigo milansang og laing duha ka triples aron pagsalbar sa Jewelers, 82-67, sa nahibiling uno ka minuto sa duwa.

Sila si Rodriguez ug Manigo mibomba og lima ka 3-points shots matag usa. Si Rodriguez mitapos og 25 puntos, samtang si Manigo midugang og 22.

Nangu sa pilderong Iloilo nga hingpit nang natagak mao si Sinco sa iyang 17 puntos, samtang sila si Francis Sanz ug Ruel Balgos mikimada og 12 puntos matag usa.

Sa laing bahin, ang Cebu Landmaster-Toledo ni realtor Joe Soberano ug coach Jun Tan naglaraw nga sakmiton ang katapusang luna sa Visayas Finals dihang makigharong kini sa Mantawi Traders ni Mayor Thadeo Ouano ug coach Eddie Ybañez sa Game-2 karong adlawa sa alas 5:30 sa hapon.

Ang Toledo maoy nag-una sa serye human gipilde ang Mantawi sa Game-1, 76-62 niadtong Mayo 16 didto sa Marcelo A. Barba Sports Complex sa dakbayan sa Toledo.