12 ka suspek pagpatay kang Viernes gikasohan
CEBU, Philippines — Misaka na sa 12 ang gidaghanon sa mga indibidwal nga pasakaan og kasong murder sa Cebu City Police Office (CCPO) may kalabotan sa pagpatay kang 23-anyos nga si Isaac Viernes, kansang lawas giingong gitabonan og semento ug uling ug gilubong sa kanhi Citilink Terminal sa Barangay Pahina Central, Cebu City.
Gipasaka sa kapulisan kagahapon, Oktubre 27, ang kasong murder batok sa 12 ka indibidwal, human madugangan ang unang 10 ka suspek nga nalambigit sa imbestigasyon.
Matud ni Police Lieutenant Colonel Gerard Ace Pelare, deputy city director for operations sa CCPO, nakakuha ang mga imbestigador og duha pa ka extrajudicial confession ug CCTV footage nga gamiton isip ebidensya sa pagpasaka sa kaso ngadto sa Cebu City Prosecutor’s Office.
Pinaagi sa bag-ong ebidensya, nasubay na sa mga imbestigador ang mga panghitabo sa wala pa, atol ug human sa pagpatay kang Viernes. Kadaghanan sa mga dugang nga nalambigit giingong mga kauban sa pagplano o pagtuman sa krimen.
Si Viernes nawala niadtong Oktubre 7 ug nakit-an ang iyang patayng lawas sa bakanteng luna sa kanhing Citilink Terminal niadtong Oktubre 19, human mipahibalo ang usa ka residente sa iyang pamilya kon asa kini gilubong.
Sa pagkakaron, duha ka nag-unang suspek ang anaa na sa kustodiya sa kapulisan.
Usa kanila nadakpan niadtong Oktubre 20, samtang ang usa mitugyan sa kapulisan pagkasunod adlaw. Apan, nagpabiling wala pa madakpi ang giingong mastermind sa krimen.
Giingong panimalos ang posibleng motibo sa pagpatay, nga nalambigit sa usa ka insidente diin giakusahan si Viernes nga nanakit sa usa ka bayot sa sulod sa convenience store sa maong barangay. Padayon kining gisusi sa mga imbestigador. IBM BANAT NEWS
- Latest
