Bag-ong truck ban sa Opon ipatuman

CEBU, Philippines — Kinahanglan nang mosunod sa bag-ong truck ban schedule ang mga operator sa trucks, vans, haulers ug uban pang susamang sakyanan sa Lapu-Lapu City ubos sa bag-ong giamendahan nga ordinansa sa trapiko sa siyudad.

Gipahibalo sa Lapu-Lapu City Traffic Management System (CTMS) ang pagpatuman sa bag-ong schedule ubos sa Ordinance No. 17-081-2026, nga nag-amendar sa Section 1 sa Ordinance No. 261-2005.

Ubos sa bag-ong schedule, ipatuman ang truck ban gikan alas-6 sa buntag hangtod alas-8 sa buntag ug gikan alas-5 sa hapon hangtod alas-8 sa gabii, matag Lunes hangtod Biyernes.

Matag Sabado, ipatuman ang truck ban gikan alas-5 sa hapon hangtod alas-8 sa gabii, samtang walay truck ban matag Dominggo.

Apil sa sakop sa truck ban ang tibuok bahin sa Maximo V. Patalinghug Avenue ug Basak-Marigondon Road, gikan sa junction niini sa Maximo V. Patalinghug Avenue hangtod sa Marigondon Junction o Crossing.

Sakop usab ang M.L. Quezon National Highway sa junction sa Marcelo Fernan Bridge, lakip ang bahin sa highway gikan sa Tacan sa Barangay Babag hangtod sa Lapu-Lapu City Central School. Ang mga motorista gikan sa Marcelo Fernan Bridge nga moliko sa wala padulong sa Mactan Economic Zone I (MEZ I) ug mogamit sa Circumferential Road kon padulong sa Basak, Marigondon, Babag, Kinalumsan ug Lo-oc.

Apan way apil sa maong ban ang nagdala og export products o materials nga padulong sa MEZ II ug Cebu Light Industrial Park (CLIP) sa Basak. Pwede silang makaagi sa maong mga dalan gikan alas-12 sa tungang gabii hangtod alas-2 sa hapon.

Gilauman nga ang bag-ong schedule makatabang sa pagkontrolar sa lihok sa mga heavy vehicle ug mga sakyanang nagkarga og kargamento panahon sa peak hours sa mga dagkong dalan sa siyudad. — /IBM (BANAT NEWS)