Miss Asia Pacific International 2026

CEBU, Philippines — Pambato sa Pilipinas , napili nga Darling of the Press

Padayon nga misidlak ang Cebu isip usa sa mga sentro kun maghisgot og mga prestihiyosong indigay hangtod na sa international level .

 Moabot ngadto  38 ka kandidata ang magtigi sa titulo nga Miss Asia Pacific International 2026 kun diin pagahimoon dinhi sa Sugbo sunod bulan ang grand coronation night niini.

Gipahigayon sa niaging adlaw ang press presentation niini didto sa NUSTAR Resort, diin gipakita usab nila ang abilidad sa pagrampa isip mga representante sa nagkalain-laing nasod.

Usa sa nakadawat og espesyal nga pasidungog  mao ang pambato sa Pilipinas nga si Gabrielle Galapia nga napili  isip Darling of the Press. Nakakuha usab sa maong pasidungog si Denise Martinez sa Honduras, isip first runner-up, ug si Sasiwararin Atsawahirankarn sa Thailand, isip second runner-up sa maong klase nga award.

Sa National Costume Competition nga gipahigayon niadtong Domingo, Septiyembre 27, sa Mactan Shrine sa Lapu-Lapu City, gipakita usab sa mga kandidata ang ilang kultura pinaagi sa ilang mga nasudnong sapot .

Nakuha ni Sandeepa Sewmini Don Samarasinghe Disanayake sa Sri Lanka ang unang pwesto, samtang si Gabrielle Galapia sa Pilipinas maoy first runner-up. Si Ry Srey Neth sa Cambodia maoy second runner-up.

Padayon nga nahimong paboritong venue ang Cebu alang sa nagkalain-laing national ug international pageants, tungod sa daghang pasilidad niini alang sa dagkong kalihokan, ingon man sa turismo, kultura ug mga destinasyon nga mahimong ikapakita sa mga bisita gikan sa lain-laing nasod.

Ang Preliminary Competition sa Miss Asia Pacific International 2026 kay mahitabo karong Oktubre 6 sa JPark Island Resort, samtang ang labing gihulat nga Grand Coronation Night kay pagahimoon karong  Oktubre 10 sa Mactan Expo Center.