7-anyos gibunalbunalan

CEBU, Philippines — Usa ka siyete anyos nga batang lalaki ang gibunal-bunalan og kahoy sa 24-anyos nga lalaki nga iyaha diay uyoan tungod lang matud pa sa away bata nga anak sa suspetsado, nahuli-cam kini ug naabot sa lokal nga kagamhanan sa Dakbayan sa Sugbo nga maoy mitutok sa kaso batuk sa suspetsado.

Ang maong video ni viral sa social media diin makita ang usa ka lalaki nga daw nagbunal og hayop gamit ang kahoy. Makita ang bata nga nagyaka ug mabati ang hilak niini sa kasakit sa iyang gibati, diin makita usab nga adunay miali sa suspek aron dili na matiwasan ang bata.

Ang bata nakaangkon og grabeng bun-og ug labhag sa iyang lawas gikan sa mga hinapsan sa lipak sa kawayan nga miluta pa sa likod niini.

Ang barangay dali nga nakaresponde sa dihang nadawat nila ang taho ug na rescue ang bata ug gidakop ug gitanggong sa Labangon Police Station.

Base sa imbestigasyon sa WCPD nga nagsugod ang pagdagmal dihang nag-away ang biktima ug anak sa suspek nga bana sa iyaan sa bata.

Matud pa napungot ang suspek ug nasobrahan sa paghapos ang biktima.

Human sa maong panghitabo mipadayag matud pa ang unang nagpaila nga guardian sa bata nga dili mosang-at og kaso batok sa suspek.

Apan mipatim-aw ang iyaan sa biktima nga maoy nibarug nga reklamante kay gusto niini mahatagan og hustisya ang iyang pag-umangkon.

Ang maong bata wala nay ginikanan kay parehong naa sa prisohan mao nga diha lang kini nagpuyo sa mga kadugo.

Ang bata nagpuyo kaniadto sa iyaan nga naa sa Consolacion ug nag eskwela apan gikuha kini sa mga kadugo diha sa Labangon hinungdan nga nakaundang sa pag eskwela hangtud karon apan mao na hinoon kini ang iyang gidangatan.

Ang iyaan sa biktima nakakuha og kopya sa CCTV nga iyang gi-upload sa social media nga maoy nakapukaw sa publiko apil na si acting Cebu City Mayor Raymond Alvin Garcia.

Personal nga giadto ni Garcia ang police station ug gimandoan ang kapulisan nga seguradohon nga mapasakaan og kaso ang suspek ug masiguro nga walay mahitabo nga settlement sa kaso.

Mipasalig usab ang barangay Labangon pinangulohan ni Kapitan Direck Yap, nga moabag usab sa mga panginahanglan sa bata ug sa paglihok sa kaso.

Gidala sa iyaan ang biktima sa barangay hall diin makita ang grabeng bun-og sa iyang likod ug naglisod kini sa paglakaw tungod matud pa sa grabeng bun-og nga abot sa bukog.

Ang bata giingong gihilantan kini tungod sa trauma nga iyang nasinati ug nakahukom ang barangay ug DSWS nga dalhon kini sa tambalanan aron maseguro nga layo kini sa peligro.

Ang suspek wala na mohatag og pamahayag sa dihang kini gikuhaan og panahom sulod sa karsel sa Labangon Police Station.

Kasong kalapasan sa Republic Act 7610 kun Child Abuse ang ipasaka batok sa suspek. (BANAT NEWS)