Top 7 most wanted sa rehiyon 7 nasikop
CEBU, Philippines — Nadakpan sa hiniusang operasyon sa Parian Police Station 1 sa Cebu City Police Office ug CIDG Regional Field Unit-7 ang 35-anyos nga lalake nga wanted diha sa Sitio Riverside, Concepcion Street, Barangay Pasil, siyudad sa Sugbo niadtong Sabado, Mayo 4, 2024.
Ang maong suspetsado nga residente ra sab sa naasoy nga lugar dunay warrant of arrest sa kasong statutory rape.
Si Hon. Marlon Jay Moneva, Presiding Judge sa Regional Trial Court Branch 74 ang nag-issue sa warrant of arrest penetsahan Mayo 3, 2024 batok sa suspetsado.
Wala’y piyansa nga girekomendar ang korte sa kasong giatubang sa suspetsado nga gikonsiderar nga Top 7 most wanted sa Rehiyon Siete.
Nunot niini, si Police Regional Office-7 Director Brigadier General Anthony Aberin midayeg sa mga police units nga nakadakop sa suspetsado.
Ang maong operasyon sa mga otoridad nagpakita lang kini nga komitido ang kapolisan sa paghatag og hustisya sa mga biktima sa krimen ingon man sa ilang pamilya.
"I congratulate the operating units for positive intelligence-driven operation and implementation of warrants of arrest against wanted persons in Central Visayas. This is a clear manifestation of our commitment to bringing justice to the victims and their families”, suma pa ni PBGen Aberin. — /MEL (BANAT NEWS)
- Latest
