Kanhi seaman napalgang nabulit og dinunggaban

CEBU, Philippines — Napalgang patay ang usa ka lalaki nga naligo sa kaugalingon dugo ug naputos og samad dinunggaban sa kalawasan alas 10:20 Huwebes sa buntag diha sa Maria Gochan St. Barangay Mambaling, Siyudad sa Sugbo.

Ang lalaki nailhan sa ngalan nga Hearty Alcantara hamtong ang panoigon lumad na taga Maranding, Lanao Del Norte. Gikataho nga usa siya ka kanhi overseas seaman.

 Sa inisyal nga imbestigasyon sa Mambaling Police Station 11 nga adunay mitaho kanila kabahin sa usa ka patay nga lawas sa usa ka lalaki sulod sa usa ka panimalay nga padayon pang gitukod.

Sa ilang pag-abot sa maong balay, napalgan nila ang maong biktima naghigda na sa sementadong salog.

Makita sa crime scene ang nauga na niyang dugo, nabulit kini og daghang samad dinunggaban sa iyang wala nga pulso, wala nga dughan, liog ug sa tiyan nga gituohang maoy hinungdan sa iyang kamatayon.

 Ang Scene of Crime Operation kun SOCO naka rekober og buak nga botelya nga posibling maoy gigamit pagdungab sa maong lalaki.

Gisubay karon sa kapolisan kun nag-unsa ang maong lalaki sa maong balay ug kun si kinsa ang iyang mga kauban nianang milabay nga gabii lakip na sab pagtino kun kang kinsa ang maong gitrabahong balay. (BANAT NEWS)