Milaban sa anak, gipusil patay
CEBU, Philippines — Patay ang usa ka amahan nga giingong milaban sa iyang anak nga gidapatan matud pa og laing tawo, apan wala damha nga diha diha pusilon siya sa maong tawo.
Nahitabo kini sa Sitio Cabulihan, Barangay Baliang, Danao City pasado alas 3 sa kaadlawon, Huwebes, Mayo 16, 2024.
Ang biktima mao si alyas Noel, 37-anyos, habal-habal driver, residente sa Sitio Langub, Barangay Guinacot, Danao City.
Samtang ang suspek nga 38 anyos, nagpuyo sa Purok 3, Barangay Sibacan, Danao City ug usa sab ka habal-habal driver.
Sa imbestigasyon sa Danao City Police Station ang anak sa biktima kuyog iyang amigo diha basketball court.
Giduol matod pa sila og duha ka tawo ug gipasanginlang maoy nakatumba sa giparking nga motorsiklo, matud pa gidapatan sa maong suspek ang anak sa biktima.
Ang anak nagpalaban sa amahan ug misumbong nga gituok kini sa suspek. Ang biktima kauban ang kapuyo mikompronta sa suspek apan kalit lang miibot og armas ang suspek ug gipusil kini sa makadaghang higayon sa kalawasan.
Atol sa pagpamusil, naigo sab sa tuo nga tiil ang amigo sa anak sa biktima. Gidala ang duha sa Danao City Provincial District Hospital apan dead on arrival na ang amahan sa nagreklamo.
Sa hot pursuit operation sa kapulisan nadakpan dayon ang suspek nga namusil sa mga biktima. (BANAT NEWS)
- Latest