“Unggoy” sa Senado

Makauuwaw nga imbes kondinahon ang China tungod sa “racist video” nga gipublikar niini nga naghulagway sa mga Pilipino nga mga unggoy mas gipili hinuon sa numero unong Senador sa Pilipinas nga depensahan ang gibuhat sa China.

Inay gamiton ang iyang gahom ug impluwensiya aron sitahon ang China sa pagyaga-yaga sa Pilipinas nga igo lang mibarog sa legal nga katungod sa iyang teritoryo, mas gipili ni Senador Robin Padilla nga motila sa lapa-lapa sa China.

Inay moprotesta nga gihinganlan og unggoy sa China ang mga Pilipino, gidawat hinuon ni Padilla ang panginsulto. Ug dili pa igo, iyang gipangitaan og lusot nganong nahimo sa China ang panginsulto sa mga Pilipino ug maoy iyang gibasol ang opisyal sa Coast Guard nga si Jay Tariela nga maoy nag-una-una ug nakapasamot sa tension.

Ambot pilay gilawog sa China kang Padilla nga nakaako man siya pagbudhi sa iyang kaugalingong nasud! Way laing haum nga paghulagway sa gihimo ni Padilla gawas sa pagtraydor sa iyang kaugalingong nasud ug sa mga Pilipino nga maoy nagpakaon niya isip sweldado sa katawhan.

Kun mas bug-at man alang ni Padilla ang interest sa China kay sa kaugalingon niyang nasud, wala na tingali nahabiling rason nga magpabilin siya sa Senado. Unsay kapuslanan nga magpadayon siya pagdawat og sweldo gikan sa buhis sa mga Pilipino kun ang iyang kasing-kasing gibihag na sa China?

Gawas nga wa siyay kapuslanan isip sakop sa Senado tungod sa kakuwang niya og abilidad ug salabutan pagpanday og balaod, wala magkinahanglan ang mga Pilipino og “unggoy” nga senador, sumala sa iyang kaugalingong pag-angkon nga ang tanang tawo gikan sa unggoy.

Naghatag sab siya og dakong kauwawan sa nasud atubangan sa kalibutanong kumunidad sa mga nasud tungod sa iyang baliko nga baruganan. Unsa may ikasulti sa ubang mga nasud, labi pa sa mga kaalyado sa Pilipinas, nga ang atong kaugalingong senador ulipon sa China.

Dili ba kataw-anan nga mas nilaban pa ang ubang mga nasud sa Pilipinas kay sa kaugalingon niini nga sakop sa Senado?

Hinaot nga susihon sa liderato sa Senado ang gipakitang taras ni Padilla tungod kay alang nako angayan siyang imbistigahan sa Ethics Committee. Gawas niini angayan sab siyang taktakon sa Armed Forces of the Philippines (AFP) isip usa kak reservist ug hukasan sa iyang ranggo.