EDITORYAL - Batang drug pushers

Ang Cebu Provincial Police Office mipahibalo nga sobra katunga sa mga batang malapason sa balaod nga naa karon sa kustodiya sa nagkadaiyang rehabilitation facilities sa probinsya ang nalambigit sa illegal nga drugas ang mga kaso.

Atol sa Hisgutan Ta media forum,  gibutyag ni Police Lieutenant Ritchil Tesoro, hepe sa Women and Children’s Protection Desk sa CPPO nga 34.09  porsiyento ang pagsaka sa mga kaso sa mga batang nalambigit sa illegal nga drugas ang mga kaso karong tuiga.

Sa miaging tuig, 2025 dunay 39 ka mga batang nadakpan tungod sa illegal nga drugas, apan karong tuiga, sugod sa Enero hangtud ning buwana niabot na og 54 ka mga bata ang nangadakpan tungod sa illegal nga drugas.

Makaalarma kini kaayo tungod kay bisan sa gipahugtang mga operasyon sa mga otoridad kontra illegal nga drugas, naa pa gihapoy mga batang nahaylo sa laang sa maong tampalasang binuhatan.

Basi sa talaan sa CPPO-WCPD , naay 105 ka mga batang nakalapas sa balaod karong tuiga, ang 99 niini pulos mga lalaki samtang unom ang mga babaye.

Kadaghan sa nalambigit sa illegal nga drugas mga batang naa sa edad nga 17 anyos.

Kaning mga batang nangadakpan ang mga kaso aning mga bataa naglambigit sa  pagpanag-iya ug pagbaligya og ilegal nga droga.

Sagad aning mga batang nalambigit ani mao kadtong mga batang wala gyud matutuki og maayo sa mga ginikanan. Kasagaran sad nila kadtong mga gikan sa kabus nga pamilya nga wala na mahatagi og panahon ang pag-atiman sa ilang mga anak.

Ang resulta, ang mga bata adto magyampungad sa mga kaubang kabataan nga parehas nilang napasagdan sab sa ginikanan, ang pinaka dili maayo ani, masagol sila sa mga notoryus nga badlungon sa ilang barangay.

Dako kaayo og papel ang katilingban sa kaugmaon sa mga kabataan sa ilang komunidad. Ang simpleng pagpakabana kanila dako na og maabtan para sa kaugmaon sa mga kabataan.

Busa importante sab kaayo ang kaakohan sa mga barangay officials sama sa paghimo og mga kalihokang magpalayo sa kabataan sa illegal nga drugas.

Subsob ang pagpaniid sa ilang mga lugar kun kinsa ang mga nalambigit sa illegal nga drugas aron maaksyonan sa mga otoridad.