Kuyawa diay uy!

Daghan ang nangalipay kay mo-operate na gyud ang Water Desalination Plant diha sa lungsod sa Cordova, Cebu ug makatabang na sa pagsulbad sa kanihit og tubig nga magamit sa katawhan.

Tinood, matud pa kon makompleto na gyud ang pag-operate sa gimugna nga Water Desalination Plant diha sa Cordovaakakuha na kita og mga 20,000 cubic meters (100,000 ka baril) nga tubig kada adlaw.

Apan angay’ng mabalaka ang mga yanong mangingisda diha sa Cordova tungod kay kon dili mamaayo sa pagkadumala kining mao nga Water Desalination Plant, mao kini ang makamugna kanila og demalas.

Daghan ang wa kaayo masayod niini, tungod kay wa gani ko makadungog nga gihisgotan kini sa mga sakop sa media ang kabahin sa gitawag og Brine.

Angay nga ang kadagkoan sa kagamhanan, ilabi na ang mayor sa Cordova nga si Didoy Suan, pagka karon pa lang, kinahanglang mohimo na og mga lakang aron mapanalipdan ang mga yanong mangingisda.

Daghan kaayo sa taga Cordova ang nagsalig sa pagpangisda isip ilang panginabuhian, ug wa masayod nga ang gimugna nga desalination plant sa ilang dapit makahatag kanila og demalas kon dili ayuhon pag-atiman.

Ang tubig sa dagat, parat. Pinaagi sa water desalination plant himoong tab-ang ang tubig sa dagat aron mahimo na nga magamit sa kabalayan, ikapangluto.

Dunay sestima nga pagahimoon aron mabuwag ang parat gikan sa tubig gikan sa dagat. Ang parat nga mahibilin, pwerte na gyud nga parata nga makadaot na kini sa mga isda.

Kon ipataka lang kini sa pagyabo ngadto sa dagat, mahimo nga makamugna kini og kadaot, mangamatay ang mga isda, ang mga bakasi, ang mga gasang ug uban pa, madaot.

Mao nga kinahanglang siguroon nga dunay tukmang pamaagi nga ang maong parat kaayo nga tubig nga gikuhaan na og tab-ang, adto kini iyabo sa lawom na nga bahin nga dili makadaot sa mga marine lives.

Balikon nako, nindot nga duna na kita’y water desalination plant. Naa diha sa Mambaling, sa Lapu-Lapu, Mandaue, apan angay’ng matngonan nato.

Ikaduha, mas mahal ang desalinated water. Ngano man? Tungod kay dako kaayo og gasto sa kuryente ang pag-process niini aron mabuwag ang tab-ang ug ang parat.

Kon nangreklamo man ang uban nga mahal ang tubig gikan sa surface water nga gi-process aron mahimong mainom ang tubig gikan sa sapa, mas moreklamo pa tingali sila kay mahal kining tubig dagat nga gipatab-ang.

Para nako, ang surface water, sama sa tubig gikan sa sapa sa Lusaran nga gi-process sa JE Hydro & Bio-Energy Corporation, mas maayo gyud kay barato ra kay sa desalinated water.

Kay nagsingabot na man ang El Niñ0, magdaginot ta sa tubig. Karon, kon wa pa lay bagyo didto sa Luzon, init na unta kaayo.