Settle g’yud

Ang mga dinagkong mga butang magsugod gyud sa ginagmay. Walay usa ka libo ka pesos kun wala ang piso. Walay parokya kun walay kapilya. Sa laing bahin walay dinagkong mga kawat kun wala ang mga ginagmay nga kawat.

Sa laktod, ang bisan unsang gamay nga makadaut, kinahanglang pakgangon nang daan aron dili makalamay ug ang bisan unsang gamay nga makaayo ang angayang palipangon aron makatabang sa umaabot.

Ang ginagmay nga sakit nga dili maatiman mamahimong makadaut ug mosangpot sa kamatayon. Ingon nga ang ginagmay nga mga sala ang mahimong magdala kanato sa kalaglagan.  Maayo nga I settle gyud mentras mahimo pa.

Sama pananglit sa atong kalambigitan sa usa’g usa ingon nga katilingban. Ang ginagmay nga bingkil nga dili maatiman ug mahilot ang moresulta og kabungkagan nga maoy nahitabo kasagaran. Kining mga butanga maoy nagdala og tigaw sa bisan unsang kahugpongan o organisasyon. Ang ginagmay nga tinanga o ang ginagmay nga lungag maoy hinungdan sa mas halapad pa nga kadaut.

Ang nahitabo sa mga nasud sa Uropa diha sa ilang kompiyansa ra kaayo nga pagpasulod ni bisan kinsa, maoy hinungdan kun nganong nahimong gubot sila karon. Kun ang thesis dunay scope and limitation apan wala kini i-apply mismo diha sa ilang pagpasulod sa mga dili nila kadugo. 

Mahimong maluoy kita o motabang ni bisan kinsa apan wala kini magpasabot nga atong tugotan sila nga manghilabot sa atong kultura ug balansayon.

Maingon nga dili nato mahimong ipamugos ang atong balansayon, kultura ug relihiyon ngadto sa uban. Sila pud mismo ang dili makahimo sa ingon ngari kanato. Kining maong limitasyon angayan nga ma settle na daan. Ang gikinahanglan mao man ang pagtahud aron mamahimong hapsay ang tanan. Matag usa bisan unsa kayano ug kagamay ang dunay matampo alang sa sa atong katilingban.