EDITORYAL - Preparasyon vs El Niño

Dili lang unta kutob sa estorya ug sa papel kaning mga pahibalo sa nagkadaiyang mga local government units nga nangangkong ilang preparasyon o pagpangandam para mamenusan ang epekto sa gikabalak-ang taliabot nga super El Niño sa sunod tuig.

Usa niini ang probinsya sa Sugbu nga nagpahibalo bahin sa ilang preparasyong gihimo nga naglakip sa pisikal nga paghimo o pagpalit og mga sudlanan sa tubig tungod kay gikabalak-an og maayong magnihit kini.

Naa pay ayuda para sa mga mag-uuma ug mananagat nga maoy hut-ong sa katilingban nga maoy responsable sa pagsigurong naay pagkaon ang matag panimalay. Apan sila maoy pinakaunang maapektohan kun moigo na ang maong katalagman.

Ning bag-ohay lang, gipahibalo sa Kapitolyo nga nigahin sila og P354.82 milyones nga pundo alang sa agrikultura sa tuig 2027, partikular sa gahinan niini ang mga mag-uuma ug mga mananagat tungod sa hulga sa taas nga huwaw nga dala sa Super El Niño.

Gawas nila, naay himuong lapad nga preparasyon para sa panglawas, kasiguradohan nga naay tubig ang tanan pinaagi sa pagpamalit og mga dugang sudlanan, pundohan, tinubdan sa tubig.

. Kung ang plano ug mga tinguha lang maoy basihan, makalagsik gyud sa publiko. Maayo lang unta og dili lang kini kutob sa papel.

Sa ubang mga lalawigan sa nasud, duna na kanilay nakasinati og grabeng huwaw kay nangauga ug nangliki na ang ilang mga yuta apil ang mga tanaman sa mga produktong agrikultura.

Gani sa Siargao, nakasinati sila didto og grabeng pagkubos sa suplay sa tubig mao nga nagsugod na og rasyon ang LGUs sa pipila ka mga barangay.

Sa karaang panultihon pa, kinabuhi ang tubig. Apan kun ang tawo dili makakita sa importansiya niini, kinabuhi ang mabutang sa peligro.

Busa nangusog karon ang gobiyerno sa kampanya para siguradong dunay tubig ang tanan sa panahon nga magnihit kini ug gikinahanglan