EDITORYAL - Wa pay solusyon sa basura

Samtang nagdagan ang mga bulan, nagkabug-at para sa Dakbayan sa Sugbu ang sitwasyon sa basura niini nga kada adlaw gikolekta nga moabot og 600-700 ka tonelada.

Dako ning problemaha tungod kay nasirad-an ang Binaliw Landfill human sa trahedya niadtong Enero 8 ning tuiga nga gikamatay sa 36 ka tawo ug daghan ang nangaangol sa dihang nahugno ang gitapok nga basura.

Human gipasirad-an ang Binaliw landfill sa Department of Environment and Natural Resources, subli kining nibalik og operate sa limitadong kapasidad matud pa sa ilang mga representante ngadto sa gipatawag nga panagtigum sa mga opisyal sa siyudad.

Ang ilang pagbalik og operate nakapakurat sa tanan, apil na kang Mayor Nestor Archival. Nasayran nga ang mga basurang gikan lang sa  pribadong sektor ang ilang gidawat.

Nibalik sila sa operasyon human nakatuman sa pipila ka mga rekomendasyon sa DENR, apan wala ni ikahimuot sa mga opisyales sa siyudad kay mura sila og “gi-blind.”

Sa pagkakaron, adto maglabayan og basura ang siyudad sa Aloguinsan landfill pero naglagiting nga kapin P3-4 milyones ka pesos ang gastos kada adlaw sa pagdala palang didto sa mga basura.

Kun molungtad ni og usa ka tuig, bilyones ka pesos ang mawala sa siyudad nga pwede pa untang gamiton para sa Cebu City Medical Center, pagtabang sa mga city scholars, ug uban pang mga importanteng galastuhan para sa mga residente sa siyudad.

Pero ang mas dakong problema karon ang dili maayong epekto sa pagtambak sa basura karon sa Pond A sa South Road Properties. Ang baho palang sa hangin nga mapadulong sa mga kabarangayan duol sa lugar, ang mga langaw, ang duga sa basura nga mapadung sa katubigan, dako ni og epekto.

Daan naman gani  kaniadto pa sa dihang nag-operate pa ang Inayawan Landfill nga nangreklamo ang mga tawo tungod sa alisbo sa kabaho sa basura. Pun-an pa anang laing peligro sa sunog nga kalit-kalit moulbo panahon sa ting-init.

Dako ning labad sa ulo ni Archival, daghan ang nireklamo apan walay nihatag og kongkreto ug malungtarong formula para masulbad ni.

Anhi makita ang iyang katakos isip mayor ug pagka-environmentalist kun unsaon ni pagsulbad nga walay maapektohan.