"Farm-to-pocket projects"

Segun sa preliminary farm-to-market (FMR) data nga natala sa Department of Agriculture, 65% lamang sa 4,810 ka FMR projects ang nakompleto s DPWH sugod niadtong tuig 2021 hangtud sa 2025. Mokabat sa dul-an 2,400 ka kilometro lang ang nahuman nga FMR projects.  Gipundohan man unta sa hingpit ang maong proyekto nga aron matabangan ang atong mga mag-uuma.  Busa dakong tanghaga kon ngano nga wala kini mangahuman.  May basehan ang pagduda sa akong amigo. Matud pa niya, “Mao tingale’ng wala mahuman ang mga proyekto kay inay ‘Farm-to-Market’ projects, nahimo na man kining ‘Farm-to-Pocket’ projects.”  Fezteleern!

Magpatoo nga la’a

Gibugnaw ni Education Secretary Sonny Angara ang spekulasyon nga tangtangon na siya isip sakop sa gabinete ni Presidente Marcos, human kuno mahinabi niya si Executive Secretary Ralph Recto kinsa namahayag nga walay mando nga pulihan siya.  Moalagad ang mga kalihim ubos sa kagustohan sa Presidente ug bisan unsang panahon, mahimo silang taktakon.  Adunay mga tawo nga kusog mopasiatab ug magpatoo nga sama o labaw pa sila kagamhanan kay sa ilang agalon. Haum kanila ang panultihon nga, “Bisan dili la’a ang usa ka bitin, magpatoo gihapon kini nga siya mala’a.”  Madahaan!

Katoohan kay gipangulipas

Alang kang Senate President Vicente “Tito” Sotto III, “unfair ug walay basehan” ang alegasyon ni Senador Imee Marcos nga gimaniobra ang 2026 national budget aron gamiton sa paglusad sa laing impeachment case batok kang Bise Presidente Sara Duterte.  Gihulagway usab ni Senador Marcos ang 2026 budget nga dili usa ka “developmental budget” kon dili usa ka “political budget”.  Taliwala ni’ng pasangil ug paglimod, angayan tamdan agi’g pahimangno ang pagya nga, “Sa natad sa politika, ayaw toohi ang bisan unsa nga isabwag nga ideya, gawas kon ipangulipas na kini sa hingtungdan.”  Muleeng!

‘Wa tlabaho, sige swelo’

Gisaway sa Alliance of Concerned Teachers (ACT) ang taas na nga panahon nga pagpalta ni Senador Bato de la Rosa sa mga sesyon sa senado samtang padayon gihapon nga nagdawat sa iyang sweldo.  Gikataho nga mitago si Senador Bato tungod kay adunay warrant of arrest nga giluwatan ang ICC batok kaniya.  Gipakita ni’ng kahimtang ni Senador “Bato” nga “Alang kanato’ng mga ordinaryo, ang “no work, nagpasabot usab nga “no pay”. Apan alang sa mga senador, ang “no work” nagpasabot lang nga wala lang gyud sila’y trabaho.”  Atala lagee!

Parehas ra’g hitsura

Mi-awhag si Cebu Archbishop Alberto S. Uy sa mga organizers sa Sinulog 2026 nga likayan nila ang pagdawat og mga sponsorships ug financial support gikan sa mga pasugalan. Gihimug-atan sa Arsobispo nga nahasupak kini sa mga values sa Santo Niño ug mahimong makapahuyang sa kasagrado sa kasaulogan.  Morag lisod tumanon kining awhag sa Arsobispo, tungod kay daghang galastohan ang maong kalihokan.  Labot pa, ang Sinulog Foundation, kinsa maoy organizer sa Sinulog 2026, dili man usa ka relihiyoso nga organisasyon.  Matud pa bitaw sa mga bilyako, “Bisan diin gikan, kinawat man o daug sa sugal o gikan sa kurapsyon o hinaguan man, parehas ra ang hitsura sa kwarta.”  Pagkatoytoy!