Bomba ni Sara
Nipasalig si Bise Sara nga kapin sa duha ka tuig silang nangandam sa iyang depensa. Nagsugod niadto pang 2024 dihang unang nitumaw ang mga istorya sa iyang impeachment sa House of Representatives.
Duha ka tuig. Morag nagtuon sa board exam. Pero pag-abot na sa ilang turno sa impeachment trial, ang iyang mga saksi mora og nangalimot sa tanan nilang gipangandaman.
* * *
Ang unang saksi nibalibad. Dili ganahang mosubli under oath sa iyang mga argumento pabor ni VP Sara sa social media. Ang ikaduhang saksi absent niadtong Lunes kay gi-MRI. Tingali ang iyang memory maoy gi-scan kay, dihang nipakita pagka Miyerkules, daghan siya og nahinumdoman nga dili maayo para sa depensa.
Ang ikatulo, ikaupat ug ikalima nakaabot sa witness stand. Pero mora og nag-audition sa kontes sa kinadaghanan og tubag nga “I don't know” ug “I can't recall.” Ang pipila nga nahinumdoman nisukwahi pa gyod sa una nilang mga tubag.
* * *
Sa bomba nga nibuto niadtong Miyerkules (spoiler alert sa wala kakita sa husay: Ang sinumbong maoy nabuthan). Ang saksi nga na-MRI nikumpisal nga nakadawat si Sara og P2.14 milyon gikan sa GenCorp. Ang kompaniya nga, sa pagsugod sa testimoniya, iyang gideklarar nga walay bisan gamayng labot si Sara.
Pero wala siyay napakita nga mga dokumento pila ang “loose investment” ni Sara. Niuyon hinuon sa prosekusyon nga mas maayo nga si Sara mismo ang moatubag sa husay pagtubag sa mga pangutana.
* * *
Mao ba kini ang depensa nga gipangandaman og kapin duha ka tuig? Nga napuno sa pasalig nga tubagon ang tanang pasangil sa tukmang lugar ug panahon? Nahadlok ko nga nahurot ang ilang panahon sa pagmaniobra sa proseso. Sama sa pagbalikbalik sa Korte Suprema ug pagkudeta sa Senado.
Ang impeachment trial dili palabwanay sa paglikay sa mga pangutana. Dili sab lumba sa paglawog sa tirong sa mga saksi (kay si Sara lahi diay og Binisaya sa bloodbath: kakak). Kansang gidaghanon nalabwan lang sa 16 ka bank executives nga gipasibog, human nahasol sa pag-adto sa Senado kay gisupinahan na sa impeachment court. Dunay kuwang ang kapin sa duha ka tuig nga pangandam. Mas maayo diay unta kon gi-apilan og memory enhancement training ug truth telling seminars.
* * *
- Latest
