Bituon ni Torre
Tungod sa hanap nga rason sa Malakang (maayo siyang hepe pero ganahang presidente og bag-ong liderato sa kapolisan), nitumaw ang daghang huhungihong sa pagkatangtang ni PNP Chief Nicholas Torre III. Usa sa pangagpas maong pakigbangga sa iyang labaw nga si Interior Secretary Jonvic Remulla (nga supak sa paglahugay ni Torre sa mga haligi sa Kampo Crame).
Mas katuohan kini kay nisunod sa irrevocable resignation ni NBI Director Jaime Santiago.
Kay wala suportahi sa Malakanyang gikan sa kampanya pagpakauwaw niya. Maguwang ni Jonvic ang labaw ni Santiago, si Justice Secretary Boying Remulla.
* * *
Kon dili kabalibad si Presidente Ferdinand Marcos Jr. sa mga Remulla (tungod sa ilang tabang paghimo niyang presidente), seguro na bang matudlo si Boying nga bag-ong Ombudsman puli sa bag-ong ni-retiro nga si Samuel Martires?
Dili pa. Kay matudlo lang ni Marcos si Boying kon maapil sa listahan sa nominees nga iduso sa Judicial and Bar Council (JBC) human sa ilang pagsubli sa tanang aplikasyon.
Ug ang Korte Suprema nga maoy nangulo ug nagsuperbisar sa JBC wala mosipsip sa administrasyon sa pagbasura sa impeachment ni Bise Presidente Sara Duterte.
* * *
Giduso nang Jonvic pagka hepe sa PNP sa wala pang eleksiyon sa Mayo 12 si Lieutenant General Jose Melencio Nartatez Jr. sa PMA Class 1992. Pero gi-extend ni Marcos si kanhi PNP Chief Rommel Marbil (suod sa gipulihang Jonvic nga si Benhur Abalos).
Nisugot si Marcos nga tangtangon si Torre ug si Nartatez ang puli tungod sa impluwensiya nilang Jonvic ug Boying (bisan si Nartatez giduso sab sa maguwang ug tig-insulto sa presidente nga si Senador Imee Marcos).
* * *
Si Jonvic mismo nipahibawo nga gitanyagan ni Marcos si Torre og laing puwesto sa gobiyerno. Gikatahong palingkuron si Torre sa gabinete ug maoy modumala sa kampanya batok sa pangurakot (kay inhinyero man, giingong gikumbinser siyang mopuli sa naapiking liderato sa Department of Public Works and Highways).
Dunay sukaranan ang paglaom nga wala pa moawop ang bituon ni Torre ning higanteng tamparos nga iyang nahiagoman.
Kon makuha ang suporta sa publiko sa mosunod nga mga adlaw, mahimong mapugos pagtuon sa mga awhag pagtanyag sa lahi niyang katakos batok sa tradisyonal nga mga politiko sa 2028.
* * *
- Latest
