Kabus gidaugdaug sa pobre

Abi nako og sa salida ra sa telebisyon o sa pelikula mahitabo ang eksina diin usa ka kabus ang gipalabi-labihan sa silingan nga alang-alang kwartahan kay lagi bati og balay nga nagdala lang og hugaw sa mga mata sa tawo ang payag nga gipuy-an. Pastilan natinood man kini sa kasinatian sa usa ka senior citizen nga biyuda. Siya ang akong na-interview sa special report nako sa krisis sa tubig kay lagi problema gyud nila ang kawalay water supply.

Apan ang naasoy'ng interview ang gikasuko sa iyang silingan nga feeling adunahan kay matud pa lagi wala kuno mananghid niya nga magpa-interview. Gisulong ug gisulod gyud barongbarong ang tiguwang sa garbosang silingan ug gibinaboy sa pagkasaba.

Katarungan sa feeling rich nga silingan nga basin maapektohan ang iyang negosyo kay diay namaligya kini og tubig nga iya sa MCWD diin usa sa nagpalitan ang pobreng biyuda. Grabeng mga sakit nga pulong ang giluwatan sa baba sa mapalabilabihon mga silingan kinsa miingon nga nagdala lang og hugaw sa mga mata sa tawo ang gipuy-an niini nga anaa kuno mahimutang sa atubangan sa ilang balay nga de koral.

Pastilan, nganong mananghid man ang pobreng byuda ngadto sa silingan sa iyang pagabuhaton nga dili man mahitungod sa negosyo ang issue kay mahitungod man sa kainit sa panahon. Labaw sa tanan wala gyud siyay labot kong bati man ang pinuy-anan sa silingan kay lagi wala may ikasarang intawon sa pagpanindot sa barong barong maglisod man gani sa pagpalit og tubig ug pagkaon.

Pagkadakong sala ang gihimo sa silingan nga mapalabilabihon kay mamahimo siyang ikiha sa pobreng silingan dihang nanulong kini ug nisulod pa gyud sa balay diin niya kini gitulisok pagmaayo. Wala usab kiniy permiso nga magnegosyo sa tubig nga iya sa water utility ug mismo gikan sa LGU mahitungod sa iyang negosyo.

Labaw sa tanan, managsama ra diay sila og status kong yuta ang hisgotan nga gitukoran sa mga pinuy-anan kay gipanag-iya kini sa Kapitolyo, ang nakalahi lang kay medyo nakaluagluag sa kinabuhi ang garbosang silingan nga  nakanegosyo ug nakapanindot sa balay ug adunay sakyanan. Apan walay kalainan sila pulos sila nakipuyo lang sa yuta nga dili ila.

Hinuon kong dunay garbosang silingan, duna usay buotan nga silingan nga nagsuporta sa pobre nga andam mohatag og ayuda sa panahon sa iyang panginahanglan. Angayan hinumduman sa mga tawo nga lingin ang kalibotan mamahimong karon siya ang naa sa ibabaw apan moabot ang panahon nga siya na sab ang naa sa ilawom.

Matud sa uban nga makagaba ra ang luha sa byuda, bahin tablan unya ang silingan niya nga garbosa kong kanunay kining manaug daug sa iyang isig ka tawo. Kong mohimo ka og katarong baslan ka og katarong ug pilopiloon ang grasya nga madawat, apan kong mohimo ka og kadautan mao usab kini ang imong mahiaguman.

Lisod gyud kining kabus kay daug daugon ra usab sa parehong pobre nga nag imagine nga siya adunahan.