Bakit numinipis ang buhok

ANG mga parte ng buhok ay ang sumusunod:

1. Ang hair follicle ang nagpapalusog sa buhok at dito tumutubo ang buhok.

2. Ang hair shaft o mismong buhok ay mula sa matigas na protina na ang tawag ay “keratin”.

3. Ang hair root o ugat ang nagpapahaba sa buhok ng mga kalahating pulgada kada buwan.

Mayroong proseso ng growth cycle ang buhok. Ang unang­ stage ay active growth na inaabot ng taon. Ang resting phase ay mula tatlo hanggang anim na buwan kung saan ang follicle ay naka-relax lang ang hawak sa hair shaft o buhok, dito mabilis mahulog and buhok. Tapos babalik na ulit sa growing phase ang buhok. Pero sabay-sabay ito nangya­yari, depende sa edad ng buhok.

Sa anit ng ulo o scalp ay mas madaling humaba ang mga buhok. Sa ibang lugar tulad ng kilay at kili-kili ay mas matagal ang paghaba ng buhok.

Alam n’yo ba na 100,000 hanggang 150,000 buhok ang nasa anit. Ang 10-20% nito ay nasa resting phase at puwe­deng malagas, kaya nga 50-100 buhok ang nalalagas araw-araw. Normal lang ito.

Pagnipis ng buhok:

Ang isang dahilan kung bakit nalalagas ang buhok ay ang pagbabago ng hormones. Ang receding hairline ay maaaring unti-unti o mabilis. Mayroon ding male pattern ng pagnipis ng buhok dahil sa lahi o namamana kaya tingnan ang mga kaanak.

Mayroon ding female pattern ng pagnipis ng buhok kung saan numinipis lang ang buhok pero hindi umuurong. Dahil sa pabagu-bago ng hormones kaya nalalagas ang buhok tatlong buwan pagkapanganak. Ang iba pang sanhi ay menopause, pagtigil ng birth control pills sa loob ng isa hang­gang tatlong buwan, pag-edad, mga stress tulad ng nama­tayan, naaksidente, problema, pagod at sakit tulad ng sa thyroid.

Ang iba pang sanhi ay kakulangan sa nutrisyon, kulang sa protina, laging gutom o nagdidiyeta.

Para malaman kung hindi normal ang hairfall ay kumuha­ ng magnifying glass at tingnan ang mga buhok. ‘Pag nabali o hair shaft breakage ang dahilan, mayroon puwe­deng gawin tulad ng pagiging gentle o maingat sa buhok, bawasan ang sobrang pag-brush, pag-shampoo o pagtali. Huwag ipa­ma­sahe ang anit dahil baka mabali ang buhok. Wala munang kemikal tulad ng hair dyes, bleaching, pangkulot o pang-unat. Puwedeng gumamit ng mga protein conditioners at cream rinse.

Pangalagaan ang hair roots sa pamamagitan ng pag-iwas sa braid at mahigpit na ponytail. Iwas din sa maiinit na rollers.

Kapag patse-patse ang pagkakalbo, dahil ‘yan sa sakit sa balat o fungal infection tulad ng ringworm. Ang ringworm ay fungal infection, korteng bilog ang pagkalagas ng buhok, mapula ang balat, nagbabalat, at makati. Madalas ito sa mga bata, galing sa alagang aso, pusa o kalaro. Pumunta sa dermatologist para bigyan ng anti-fungal cream tulad ng ketoconazole.

Mayroon ding Trichotillomania (hair pulling disorder) kung saan naging ugali na laging hinihila o binubunot ang buhok.