Pagkat-on mo’g pamatasan uy!

Mianhi sa Cebu City niadtong Sabado si Senador Imee Marcos, ug sa iyang pagbisita nakighimamat kini sa mga sakop sa media ug usa ko nga giimbitar pagpatambong sa press conference.

Si Imee maayong manubag sa bisan unsang pangutana sa mga sakop sa media, apan sipsip lang kaayo ang mga tawo nga gisaligan niya sa pagdumala sa presscon.

Una, ilang gidid-an ang media nga mangutana sa pipila ka isyu, apil ang isyu kabahin sa Bus Rapid Transit, pero dako nga tamparos kanila kay si Imee pa gani hinuon ang nangutana niini.

Sa wa pa magsugod ang presscon, mihatag sila og “guidelines” kun lagda nga kada media, usa lang ka pangutana ug usa ka follow-up, apan wa makabadlong sa mga nagpabadlong nga media.

Duna sa’y pipila ka media nga subra tingali ang bilib sa ilang kaugalingon, ug wa na’y respito sa ilang mga kauban, kay bisan dili pa ilang turno pagpangutana, sila maoy mipatugbaw sa ilang tingog pagpangutana.

Dunay mga media nga tulo gyud ka pangutana ang gipasupot, ug daw wa nay pamatasan ngadto sa nagdumala sa presscon ug sa uban nilang mga kauban, nga unta dili pa gani turno nila pagpangutana.

Dinhing bahina, ang nagpaalig-alig nga maoy “moderator” sa presscon, wa makabadlong, aron unta mahatagan og hustisya ang diha na nagbarog atubangan sa microphone aron mangutana.

Ako nga ikatulo unta nga mangutana kang Imee, kay diha na ko atubangan sa microphone, wa na gyud hinuon makapangutana kay daghan man ang nangutana nga way pagtugot, ug ang gitugotan nga mi-insert pagpangutana.

Dunay usa ka media nga human na unta nakapangutana, apan misinggit pa gyud, og laing pangutana, pastilan.

Dayon, ang nagpaka-moderator, mipahibawo nga “last question” na ang pangutana sa laing media nga gipa-insert ug nagpasabot nga wa na ko’y higayon pagpangutana.

Apan daw naigo sa tamparos ang maong nagpaka-moderator kay ang senador giganahan pa nga nanubag sa mga pangutana ug mao pa gani ang nangutana sa isyu kabahin sa BRT dinhi sa Cebu.

Diha pa ang nagpaka moderator miingon nga papangutan-on ko ngadto ni Imee, apan wa na nako kini tagda.

Gituyo ko kini pagsuwat, dili pagpakauwaw sa hingtungdan, apan aron pagtudlo kaniya og tukmang pamatasan, ug apil na sa ubang media nga way respito sa ilang mga kauban.

Sa mga tigpasiugda sa presscon, ayaw ninyo hikawi ang media sa pagpangutana sa mga isyu, kay ang inyong opisyal nga paatubangon sa presscon, utokan kana ug maantigo manubag, dili sama kaninyo nga limitado lang tingali ang nahibaw-an.

Unta, dili na masubli ang ingon niadto nga sitwasyon.