EDITORYAL - Himsog nga populasyon

Panahon na gyud nga mahatagan og atensyon ang populasyon sa Pilipinas nga karon hapit na mag 110 milyones. Ang populasyon sa usa ka nasud maoy naghatag og kinabuhi niini. Mao kini ang magpadagan sa tanan, gikan sa panggobiyerno ug sa ekonomiya niini.

Apan ang populasyon sab maoy magdiktar sa kaugmaon sa usa ka nasud. Kun dili hatagan og pagtagad ang populasyon sama sa edukasyon, trabaho, seguridad, maayong panglawas, patas nga atensyon sa gobiyerno ug uban pa, mao sab kini maoy mobira sa ekonomiya sa nasud ngadto sa ubos.

Busa mayo kining gipahibalo ni Presidente Ferdinand Marcos Jr. nga paglusad sa lima ka tuig nga Philippine Development Plan and of Action -2023-2028 nga ang tumong mao ang pagtutok sa populasyon ug ang pagpalambo niini aron mamahimong mabungahong tigtampo sa kalamboan sa nasud.

Sa pagkakaron, base sa 2020 census, ang Pilipinas adunay 9 milyones kapin ug kulang nga senior citizens.

Nagpasabot kini nga ubay-ubay na kanila ang wala nay trabaho karon tungod sa naa ka kadaghanan nila ang naa sa retirement ages. Sa pikas bahin, kapin sa 60 porsiyento niini og kapin 63 milyones ang nag-edad og 15 ngadto sa 64 anyos, sila kadtong naa pa sa working age.

Apan dili tanan aning naa sa working age ang naay trabaho karon. Ang uban aduna tuod trabaho apan kuwang ang kita matag adlaw aron masuportahan ilang pamilya.

Kini nga working age maoy angay hatagan og dakong pagtagad kay sila maoy nagpadagan sa ekonomikanhong kalihokan sa nasud.

Ang nga kabataan mahatagan og maayong kaugmaon kun palambuon ang kasamtang sistema sa edukasyon, dili usbon o ilisan og bag-ong sistema nga makapalangan lang ka pulos eksperimento ray mahimo.

Kini sama sa K to 12 nga nakasugod na, kinahanglan lang bubuan og pundo ang mga  eskuylahan aron makabaton og mga kagamitan, makinarya, laboratory ug magtutudlo aron maka prodyus og job-ready graduates.

Hatagan og tsansa makatrabo og balik ang mga senior citizens aron sila makatampo gihapon sa nasud ug malagsik samtang giatiman ang maayong panglawas sa tanan.

Labaw sa tanan, kinahanglang seryuso ang implimentasyon aning plano aron dili mausik ang panahon.