Ikakawhaag-walo nga adlaw Mga Dili Kasarangang Lihok sa Yawa: Panlupig Sukaranang Teksto

“Ituboy kaniya ang tanan ninyong kabalaka kay siya ang mag-atiman kaninyo”  (1 Ped. 5;7).

Pasiuna

1.   Kasagaran sa pag-ataki nagtukbil sa mga sentido. Sama pananglit sa mga panan-awon nga makalilisang, makadungog og mga hunghong, usahay matakboyan og mga balatian nga lisud kaayo tugkaron sa siyensiya. Ang ataki kasagaran pisikal, sikolohikal ug espiritwal.

2. Ang pag-ataki mahimong sekswal ang kinaiya. Gikan sa panghikap hikap sa nagkadaiyang bahin sa lawas apil na ang mga pribadong bahin, hangtud na gani sa pagpanglugos ngadto sa biktima.

3. Tungod sa mga abli kun ganghaan gumikan sa mga balansayon sa occult, nahimong mas hasion ang biktima o mga biktima o mga biktima. Gikinahanglan gyud nila ang tabang gikan sa mga tawo nga dunay kahibalo kalabot sa pagpangalagad sa pagpalingkawas ug eksorsismo.

Pagpalawom

Kasagaran naglambigit kini sa tunglo nga gipadala ngadto sa biktima. Mahimong atakihon dili lang ang panglawas nga kahimtang sa biktima kondili apil na usab ang iyang panginabuhian ug kadtong mga mahal sa iyang kinabuhi. Sa laing bahin, ang panlupig nahitabo usab ingon nga panimalos gikan sa mga demonyo o mga Espiritu sa kinaiyahan kun mga elemental spirits. Kun dunay putlon nga mga kahoy mamahimong mahitabo sa mga tunghaan ang Mass Hysteria. Ang kinabuhi sa mga Santos usab nagpahinumdom kanato nga sila usab mismo nahimong biktima sa Panlupig sa mga Demonyo. Sama pananglit sa mga kasinatian nila ni San Juan Bosco ug San Juan Maria Vianney sa Ars, France. Angayan lamang nga kita magmatngon kaysa pagduol nato sa mga tambalan ug mga albularyo mamahimong mas mograbe pa hinuon ang kahimtang nato. Dili kita angay mahadlok kay ang Dios wala man manghinan-aw sa atong kahimtang. Sayud siya sa atong mga pangihanglan!

Pangamuyo

Ginoong Jesus, akong gipangayo kanimo nga imong panalipdan ang akong banay (Isulti ang pangalan sa matag usa) gikan sa mga sakit, gikan sa tanang mga kadaut ug mga aksidente. Kun ugaling dunay usa namo nga ang gipadad-an og bisan unsang tunglo, yamyam ug panghimaraot, akong gideklarar kining tanan ingon nga walay pulos ug walay gahum alang kanamo sa ngalan sa among Ginoong Jesu Kristo! Ako silang gipadala ngadto kang Ginoong Jesus aron siya na mismo ang mag-igo alang kanila ug mobalhog kanila ngadto sa impiyerno! Ginoo, nagahangyo ako nga imong ipadala ang mga Balaang mga Anghel nga Magbantay alang kanamo ug manalipod kanamo ug sa tanang mga tawo ug kabtangan nga mahal kaayo namo. Amen!

Kalihukan Karong Adlawa

Pamalandongi kining mosunod nga mga pangutana:

1. Susiha kun duna bay mga tawo nga kanimo naglagot ug mga tawo nga imong napasakitan?

2. Himoa ang pagpangutana basin ug ang inyong mga katigulangan o ikaw ba gyud mismo ang dunay mga tawong gilupigan?

3. Unsay kasagarang sakit ug mga panghitabo nga nasinati sa inyong pamilya diha sa inyong kasaysayan?