Mao diay

Mao diay. Nga bisan sa tam-is nga pasaligay nilang Presidente Ferdinand Marcos Jr. ug Bise Presidente Sara Duterte Carpio nga nagpadayon ang ilang panaghigalaay, nagsige gihapon ang tinulisokay sa mga sakop sa ilang pamilya ug mga alyado sa politika.

Mao diay. Nga bisan gibakwi nang kanhi Presidente Rodrigo Duterte nga iyang pasangil nga bangag si Marcos Jr., nagpadayon si Duterte sa paghimo og mga rally sa Mindanao, kabisay-an ug Luzon, bisan sa mga lugar nga gilikayan sa mayoriya sa mga politiko (Cebu City) ug wa hatagi og permiso (Dumaguete City).

* * *

Mao diay. Nga bisan sa gibalibalik na pasalig ni Marcos Jr. nga di siya motabang sa imbestigasyon sa International Criminal Court (ICC) sa laktod nga pinatyanay sa administrasyong Duterte ug nga di niya ipatuman kon dunay arrest warrants nga luwatan, mora gihapon og gilubat-lubatan ang kanhi presidente ug ang iyang mga sinugo sa Davao Death Squad ug sa nasudnong gubat batok sa drugas.

Kay duna diay nahibaw-an ang mga Duterte. Nga nakapakumbinser nila nga di kasaligan ang sulti sa presidente. Nga bisan unsang orasa mahimong mabalhog sa The Hague.

* * *

Nahipos nilang kasayuran mas makalilisang sa mga sungog ni kanhi Senador Antonio Trillanes IV. Nga luwatan nang arrest warrant batok sa kanhi presidente karong Hunyo. Ug isunod pagpadakop ang bise presidente ug duha ka senador karong Hulyo.

Si Senador Bato dela Rosa mismo ang nakahipos sa kasayuran. Ginamit ang iyang lapad nga mga koneksiyon isip kanhi hepe sa kapolisan. Nga dunay mga polis nga nitabang na sa ICC sa pagpalig-on sa mga ebidensiya batok nila.

* * *

Ambot unsa katinuod ang nahibaw-an ni dela Rosa, kay mahimong gipakapinan na lang niya, nga dakong opisyal sa kapolisan ang nang-recruit sa mga polis nga mosaksi batok nila ug nga dakong opisyal sa administrasyon ang nitanyag og kuwarta bugti sa mga testimoniya.

Pero usa ka butang ang nabantang: Bisan sa tanang pagpaka aron ingnon, ang administrasyong Marcos di tinuod nga nahigugma ug ganahang magpadayon sa pakighiusa sa mga Duterte; ug ang mga Duterte nahibawo nga ang tanang ulug-ulog ug awhag sa panaghiusa kabahin lang sa hanig sa paglawog nila sa langyaw nga korte nga di nila mahudlat.

* * *

[email protected]