Amigo sa tanan

Gihimong dakong isyu sa pipila ka tawo kon kinsa ang migasto sa pag-travel sa mga kapitan sa kabarangayan sa Cebu City nga nangadto sa Boracay sa miaging semana.

Ang ilang argumento mao nga kon si Mayor Michael Rama man ang migasto niadtong mao nga paglulinghayaw, dili ba kuno maisip nga pagpangdani kini sa mga kapitan aron mosuporta na niya?

Base sa akong nahibaw-an, ang tanang kapitan sa 80 ka barangay sa Cebu City – alyado man sa Barug Team Rama ug sa BOPK – parehong giimbitar ug didto sa Boracay wa sila maghisgot og kabahin politika.

Pananglit kuno og ang migasto sa trip mao ang usa ka kwartahang politiko nga kaalyado sa politikanhong pundok nga kaatbang ni Rama sa miaging eleksiyon, maisip na ba kuno kini nga timailhan nga siya na ang himoong bise mayor ni Rama kon magpapili siya pagbalik?

Kining puntoha, masabot nato nga duna nay gamay nga pagpangintriga. Gusto nila nga gub-on ang maayong panagsuod nila ni Mayor Rama ug Vice Mayor Raymond Alvin Garcia.

Nakakita man sila nga lig-on karon ang ilang panag-tandem mao nga suwayan nila’g guba.

Pananglit kuno dunay laing magpapatigayon nga maoy migasto sa maong kalihokan, basin og adunay business interest nga ang bugti niini aron hatagan kini’g pabor sa mga transaksyon sa Cebu City government.

Atol sa mao nga kalihokan, giklaro gyud ni Mayor Rama ngadto sa mga opisyal sa kabarangayan nga “independente” siya nga mayor karong eleksiyon sa mga opisyal sa barangay. Wa siya’y labanan.

Gani, nahibaw-an nako nga adunay mga kaalyado ni Rama sa politika nga wa makagusto niini kay makapabor man kuno ang mga alyado sa BOPK nga magpapili sa katungdanan sa barangay.

Aw, dili nato kabut-an niana ang mayor kay mao may iyang gusto nga patas ang iyang pagtagad ngadto sa tanang magpapili sa katungdanan sa barangay karong Oktubre.

Balik ta kon kinsa’y migasto sa pag-adto sa Boracay. Nakabasa ko nga matud sa mayor nag-loan siya og kwarta aron nga magamit sa trip.

Kon ibutang nato nga si Mayor Rama ang migasto niadto, nakahimo ba diay og salaod ang mayor nga wa pa may kampanya sa mga mokandidato sa eleksyon sa barangay?

Pananglit ang kwartahan nga politiko diha sa City Council maoy migasto, kabut-an diay siya paggasto sa iyang kwarta aron ang mga kauban niyang opisyal malingaw?

Ang balaod nagdili sa mga politiko nga modawat og mga suborno, mga gift nga dagko’g kantidad, apan kon sila’y mogasto sa ilang kwarta para sa tanan nga way gipinig, ilabi na nga wa pay eleksyon, para nako way magbuot uy.